Milyonluq tenderlər və cavabsız suallar:Gülnaz Dadaşovanın 8 illik rəhbərliyi

Azərbaycanda hər iki ölüm sənədindən biri ürək xəstəliyidir: Kardiologiya İnstitutunun 8 illik fəaliyyəti və milyonluq tenderlər sorğu-sual olunur

Azərbaycanda qan dövranı sistemi xəstəliklərinin qorxulu dinamikası və bu sahəyə cavabdeh olan əsas elmi-tibbi müəssisə — Akademik C.M. Abdullayev adına Elmi-Tədqiqat Kardiologiya İnstitutundakı idarəetmə böhranı ifşa olunub.

1xeber.media xəbər verir ki,Bizimesr.info saytının apardığı geniş araşdırmaya istinadən xəbər verilir ki, ölkədə ürək-damar xəstəliklərindən ölüm və yeni diaqnoz göstəriciləri ildən-ilə kəskin artdığı halda, institutun 8 illik direktoru professor Gülnaz Dadaşovanın fəaliyyəti real nəticələrlə deyil, şəxsi PR kampaniyaları və daxili kadr qalmaqalları ilə gündəmdədir.

Ölüm və xəstəlik statistikası 66% artıb

Dövlət Statistika Komitəsinin rəsmi məlumatlarına əsasən, Azərbaycanda qan dövranı sistemi xəstəlikləri üzrə ilk dəfə diaqnoz qoyulan xəstələrin sayı 2020-cı ildəki 148 516 nəfərdən, 2025-ci ildə 247 019 nəfərə yüksəlib. Bu isə son 5 ildə xəstə sayının təxminən 66 faiz artması deməkdir.

Daha sarsıdıcı rəqəm isə ölüm statistikası ilə bağlıdır. 2025-ci ildə ölkədə qan dövranı xəstəliklərindən 33 555 nəfər vəfat edib ki, bu da həmin il Azərbaycanda qeydə alınan bütün ölüm hallarının 56 faizini təşkil edir. Başqa sözlə, ölkədə baş verən hər iki ölüm hadisəsindən biri məhz ürək-damar problemlərindən qaynaqlanır.

Şəxsi PR uğurludur, bəs kollektiv nəticə?

Araşdırmada vurğulanır ki, direktor Gülnaz Dadaşovanın rəsmi bioqrafiyasında 80-ə yaxın elmi işi, beynəlxalq konfranslarda sədrlikləri və İsveçrə, Türkiyə kimi ölkələrə silsilə səfərləri qabardılsa da, bunlar institutun kollektiv uğuru sayıla bilməz. İnstitutun rəsmi saytındakı xəbərlərin birbaşa direktorun adı üzərində vizual olaraq qurulması tənqid olunub.

Jurnalist araşdırmasında fundamental suallar irəli sürülür: Bu qədər səfər və tədbirlər fonunda institut tərəfindən ürək xəstəliklərinin qarşısını almaq üçün hansı yeni milli tədqiqat proqramı və ya müalicə metodu tətbiq olunub? [1] Statistik rəqəmlər göstərir ki, vəziyyət heç də təqdim edilən "inkişaf" formatında deyil.

Alimlər elmlə yox, rəhbərliklə məhkəmə çəkişməsindədir

Məqalədə institutun daxilindəki acınacaqlı kadr siyasəti və kütləvi narazılıqlar sənədlərlə diqqətə çatdırılır:

Prof. Elman Ələkbərov: Uzun illər infarkt şöbəsinə rəhbərlik etmiş tanınmış alim, son iki ildə elmi işlərin aparılmasına və xəstə qəbuluna şərait yaradılmadığı üçün rəhbərliklə yaranan ixtilafdan sonra işdən ayrılıb

Prof. Sona Qəhrəmanova: İşdən çıxarılmasına qarşı apellyasiya və Ali Məhkəmə instansiyalarında qələbə qazanaraq öz hüquqlarını bərpa etdirib

Dr. Azad Hacıyev: İnstitutun keçmiş baş həkimi, elmi şöbə müdiri olduğu müddətdə əməkhaqqını tam almadığı iddiası ilə direktor Gülnaz Dadaşovanı məhkəməyə verib

Kütləvi attestasiya imtinası (2025): İnstitutun elmi dərəcəli 20-yə yaxın əməkdaşı attestasiyanın qanunsuz təşkil edildiyini əsas gətirərək prosesdən kütləvi şəkildə imtina edib

2026-cı il avqust etirazları: Elmi işçilər Elmira Həsənova, Dürdanə Zamanova və kardioloq Səidə Rəcəbli yaş bəhanəsi ilə işdən çıxarılmalarına qarşı hazırda məhkəmə müstəvisində mübarizə aparırlar.

Milyonluq satınalmalar və gənc kadrların boğulması

İnstitut tərəfindən dövlət vəsaiti hesabına irimiqyaslı maliyyə əməliyyatları icra edilib. 2025-ci ilin sentyabrında "Arash Medical Company" QSC ilə 1 milyon 392 min manatlıq avadanlıq, 2026-cı ilin avqustunda isə invaziv müdaxilələr üçün 1 milyon 734 min manatlıq tibbi material tenderi keçirilib. Lakin bu milyonluq xərclərin klinik effekti, hansı şöbələrdə quraşdırıldığı və neçə xəstənin həyatını xilas etdiyi barədə heç bir şəffaf hesabat yoxdur.

Eyni zamanda, G.Dadaşovanın direktorluğu dövründə yeni elmi kadrların, o cümlədən elmlər namizədlərinin hazırlanmasında ciddi durğunluq yarandığı, müdafiəyə hazırlaşan gənc alimlərin elmdən uzaqlaşdırılaraq rutin inzibati işlərə cəlb edildiyi vurğulanır.

Bizimesr.info-nun analitik heyəti qeyd edir ki, Kardiologiya İnstitutu bir nəfərin şəxsi nüfuz platforması deyil, strateji dövlət müəssisəsidir. Səhiyyə Nazirliyi sistemində böyük islahatların getdiyi bir vaxtda, bu idarəçilik modelinə dərhal yenidən baxılmalı və instituta yeni nəfəs verilməlidir.