Rafiq Əliyevin hoteli yenidən satışa çıxarılır

 Dini Qurumlarla İş üzrə Dövlət Komitəsinin keçmiş sədri, “İrşad” İslam Araşdırmaları Mərkəzinin direktoru Rafiq Əliyevə məxsus hotel özünə yeni sahib tapa bilməyib.

1xeber.media  yeniavaz.com-a istinadla xəbər verir ki, Vaqif prospekti-11a ünvanında yerləşən və icra məmurlarının sifarişi əsasında hərraca çıxarılan obyekt 6 mərtəbədən ibarətdir.

Satışa çıxarılan obyektin torpaq sahəsinin ölçüsü 0,06076 hektara bərabərdir. 50 otaqdan ibarət olan və hazırda “GreenPark” adlı otel kimi fəaliyyət göstərən obyekt bu gün hərrac vasitəsilə satışa çıxarılsa da hərrac baş tutmayıb.  

Obyektin ilkin bazar qiyməti 6 milyon 543 min 400 manat həcmində dəyərləndirilib. Bu gün üçün nəzərdə tutulan və baş tutmayan hərracda obyekt dəyərindən ucuz – 5 milyon 561 min 890 manata satışa çıxarılıb. Noyabrın 22-də növbəti hərrac keçiriləcək və bu dəfə obyekt 4 milyon 253 min 210 manata təklif olunacaq.

Bir neçə il əvvəl Rafiq Əliyev ilə Nəsimi Rayon İcra Hakimiyyəti arasında tikinti ilə bağlı qalmaqal yaşanıb. Rafiq Əliyev iddia edib ki, “İrşad” hotelinin yanındakı 1 sota yaxın ərazidə tikinti işlərinin aparılmasına mane olub. Keçmiş sədr hətta iddia edib ki, icra hakimiyyəti ondan tikintiyə icazə üçün 300 min manat rüşvət tələb edib. Daha sonra tikinti işlərinə icazə verildiyini bildirib.

Bundan başqa, “İrşad” oteli ilə bağlı daha bir qalmaqallı məlumatı Dubayda yaşayan iş adamı İsa Məhəmməd Salih səsləndirib. O iddia edib ki, 1996-cı ildə Bakıda namizədlik dissertasiyasını müdafiə edib. Elmi rəhbəri isə Rafiq Əliyev olub. Elə həmin vaxt onlar Bakı İslam Universitetinin tələbələri üçün yataqxana tikintisi barədə razılığa gəliblər.

Hotel fəaliyyətə başladıqdan sonra İsa Məhəmməd Salihə 2 il ərzində gəlirlərdən pay verilib. Lakin Rafiq Əliyev Dini Qurumlarla İş üzrə Dövlət Komitəsinin sədri olduqdan sonra dubaylı iş adamı ilə əlaqələri kəsib və ona heç bir ödəniş etməyib.