Rusiya Prezidenti Vladimir Putin Çin Xalq Respublikasının Sədri Si Cinpinlə keçirdiyi görüş zamanı Ukraynadakı müharibənin gedişi barədə məlumat verib.
1xeber.media xəbər verir ki, bu barədə Kremlin mətbuat katibi Dmitri Peskov açıqlama verib. TASS agentliyinin məlumatına görə, Putin və Si Cinpin arasında məhdud tərkibdə keçirilən danışıqlarda Ukraynadakı vəziyyət müzakirə olunub. Jurnalistlərin xüsusi hərbi əməliyyat zonasındakı vəziyyətin görüşdə gündəmə gəlib-gəlmədiyi ilə bağlı sualını cavablandıran Peskov bunu təsdiqləyib.
Məlumata görə, Putin Çin liderinə ABŞ Prezidenti Donald Trampın xüsusi nümayəndələri Stiv Uitkoff və Cared Kuşnerlə Moskvada apardığı danışıqlar barədə də məlumat verib.
Qeyd edək ki, Vladimir Putin noyabrın 17-də Asiya-Sakit Okean İqtisadi Əməkdaşlıq Təşkilatının (APEC) sammitində iştirak etmək üçün Çinin Şençjen şəhərinə səfər edib. Səfər çərçivəsində Rusiya və Çin liderləri arasında ikitərəfli görüş keçirilib.
Bununla yanaşı, noyabrın 19-da Putin, ABŞ Prezidenti Donald Tramp və Si Cinpin arasında üçtərəfli görüşün keçirilməsi planlaşdırılır. Gözlənilən görüşdə Ukrayna müharibəsi, İran ətrafında vəziyyət, nüvə silahlarına nəzarət və beynəlxalq təhlükəsizlik məsələlərinin müzakirə olunacağı bildirilir.
Rusiya xarici işlər nazirinin müavini Sergey Ryabkov da üç liderin görüşündə Ukrayna ilə bağlı dialoqun davam etdirilməsi məsələsinin müzakirə oluna biləcəyini açıqlayıb.
Reuters-in məlumatına görə, üçtərəfli görüşdə nüvə silahlarının azaldılması, beynəlxalq ticarət və süni intellekt sahəsində əməkdaşlıq məsələləri də gündəmdə ola bilər.