Trampla bağlı illüziyalara qapılmayın - Rusiyanın ABŞ-dakı keçmiş səfiri Antonov

ABŞ-ın yeni seçilmiş prezidenti Donald Trampın andiçmə mərasimindən sonra Rusiya-Amerika münasibətləri ilə bağlı heç bir illüziyaya ehtiyac yoxdur. 1xeber.media xəbər verir ki, bunu “Kommersant”a müsahibəsində Rusiyanın ABŞ-dakı keçmiş səfiri Anatoli Antonov deyib.

Antonov qeyd edib ki, politoloqlar və jurnalistlər Trampın dövründə Moskva ilə Vaşinqton arasında münasibətlərin inkişafı ilə bağlı əsasən müsbət proqnozlar verirlər. Keçmiş səfirin sözlərinə görə, o, “sadə insanların daha yaxşı gələcəyə olan ümidlərini” başa düşür.

“Ancaq ölkəmizi daha da zənginləşdirəcək, evimizə xoşbəxtlik gətirəcək hansısa “əmi”yə illüziya ümid bəsləməməliyik. Hesab edirəm ki, biz yalnız öz gücümüzə arxalanaraq vətənimizin çiçəklənməsinə özümüz nail olmalıyıq. "Rusiya güclüdürsə, bizə hörmət ediləcək", - Antonov vurğulayıb.

Diplomat əlavə edib ki, Trampın ilk müddətinin əvvəlində çoxları da Rusiya-Amerika münasibətlərinin yaxşılaşacağına ümid edirdi, lakin bu ümidlər özünü doğrultmadı. Xüsusilə, ABŞ-da Rusiyanın diplomatik mülkiyyəti dondurulmuşdu və “uzaqdan bəhanələrlə rus diplomatlarını ölkədən çıxarmaq kimi kədərli təcrübə çiçəkləndi”. Bundan əlavə, Amerika hakimiyyəti 2010-cu ildə Strateji Silahların Azaldılması Müqaviləsi (START) müddətini uzatmaqdan imtina edib.

Dekabrda Rusiya xarici işlər nazirinin müavini Sergey Ryabkov bildirmişdi ki, Rusiya ABŞ-ın yeni administrasiyasından müsadirə edilmiş diplomatik əmlakın geri qaytarılmasını istəyəcək.