“ANALOQU OLMAYAN” RABİTƏ XİDMƏTİ...

“ANALOQU OLMAYAN” RABİTƏ XİDMƏTİ

2022-ci ilin sonunda ölkəmizdə telefon rabitəsindən istifadə üçün abunə haqqı 2 manat 50 qəpikdən 3 manat 50 qəpiyə qaldırıldı. 

1xeber.media xəbər verir ki, bu barədə Sima Babayeva Facebook səhifəsində paylaşım edib.

Daha sonra Babayeva bildirib ki,bunu xidmət keyfiyyətinin artırılması məqsədi ilə etdiklərini dedilər. Xidmət keyfiyyətində dedikdə isə stasionar telefon rabitəsi kabellərinin fiber-optik kabellərlə əvəz edilməsi kimi başa düşülürdü. İndi bu qərarın verildiyi tarixdən 3 il ötür. 

Hələ də fiber-optikləşmə yekunlaşmayıb. Halbuki, rəqəmsal inkişaf və nəqliyyat naziri  Rəşad Nəbiyev elə 3 il əvvəl-2022-ci ilin dekabrında Bakıda keçirilmiş “II İllik İnnovasiyalar Sammiti”ndə  2024-cü ilin sonuna qədər Azərbaycanın tamamilə genişzolaqlı internetlə təmin edilməsinin qarşıya məqsəd qoyulduğunu demişdi. 

Hələ də bu işlər davam etdirilirsə, deməli qarşıya qoyulan məqsəd yerinə yetirilməyib.

Cənab nazir onu da bilməlidir ki, bəzi rabitı işçiləri köhnə xətlərin yenilənməsi adı ilə vətəndaşların telefon xətlərini qapadıb onları günlərlə rabitəsiz qoyurlar. 

Əgər xətt yenilənirsə, necə ola bilir ki, eyni binada bir mənzildə telefon işləyir, digərində isə yox? Xəttin yenilənməsinə gəldikdə isə elə təxminən 3 ildir ki, binaların həyətində, bloklarda kabel çəkildiyini görürdük. 

Soruşanda, bunun fiber-optik rabitəyə keçid üçün olduğunu deyirdilər. Onda belə çıxır ki, əvvəl xidmətin qiymətini artırırlar, sonra özünü. İndi son günlər ATS dediyimiz idarələrdən sakinlərə zəng edib yeni sistemə keçməli olduqları bildirilir, əks təqdirdə mənzildəki telefon xəttinin və nömrəsinin birdəfəlik ləğv olunacağı deyilir. 

Ardından da, yuxarıda qeyd etdiyim kimi telefon xəttini qapadırlar. Abunəçi aylıq rabitə xidməti haqqını ödəyibsə, nə ixtiyarla onun xətti bağlanılır? Bu suala hörmətli nazir və tabeliyindəki məmurlar cavab verə bilərmi? 

Axı sakinlərin içində kimsəsiz, ahıl, xəstə olanı, savadlı, savadsızı da olur. Bir kampaniyaya başlamazdan əvvəl olmaz ki, əhali arasında geniş izahat işi aparılsın? 

Stasionar telefon xətlərini bağladığınız abunəçilər haqlı olaraq məhkəməyə müraciət etsələr, o halda nə cavab verəcəksiniz?