Gültəkin Hacıbəylinin saxlanmadan öncə çəkdiyi video yayıldı

Sosial şəbəkələrdə Gültəkin Hacıbəylinin saxlanılmasından qısa müddət əvvəl çəkdiyi və özü tərəfindən yayımladığı video sürətlə gündəmə çevrilib.
1xeber.media xəbər verir ki, həmin görüntülər bir neçə dəqiqə ərzində müxtəlif platformalarda paylaşılıb və müzakirələr doğurub.

Videoda Gültəkin Hacıbəyli iddia edir ki, hüquq-mühafizə orqanları onun yaşadığı mənzilə “qapını sındıraraq daxil olub” və onu saxlamağa cəhd göstərib. O, Bakıya ekstradisiya olunacağı barədə narahatlığını da bildirir. Lakin Musavat.com-un əldə etdiyi məlumatlara əsasən, yayılan kadrların heç bir hissəsində Gültəkin Hacıbəyliyə qarşı zorakılıq, məhdudlaşdırıcı fiziki hərəkət və ya videonun çəkilməsinə maneə faktı görünmür.

Diqqətçəkən məqamlardan biri isə odur ki, həmin video sosial şəbəkələrdə montaj edilmiş formada da yayılıb. Belə ki, bəzi profillər görüntülərə Gültəkin Hacıbəylinin illər əvvəl Ramiz Mehdiyev haqqında səsləndirdiyi tərif dolu sözləri əlavə edərək ironik materiallar hazırlayıb.

Hazırda sosial şəbəkələrdə həm videonun özü, həm də montaj olunmuş versiyalar intensiv şəkildə paylaşılır. Gültəkin Hacıbəylinin hansı cinayət əməllərini törətməsi rəsmi açıqlamalardan sonra daha da aydın olacaq.