Bir ay sonra MSK-nın yeni tərkibinin formalaşdırılması başlayacaq. Yada salaq ki, MSK-nın hazırkı tərkibi 2021-ci ilin aprel ayının 27-də formalaşıb. Mövcud qanunvericiliyə görə, MSK-nın səlahiyyət müddəti 5 ildir. Hazırda MSK-ya mart ayında 75 yaşı tamam olacaq Məzahir Pənahov sədrlik edir.
Bu arada YAP-ın ikinci adam olan Tahir Budaqovun gözlənilmədən Dövlət Statistika Komitəsi sədrliyindən Nəsimi rayonuna icra başçısı təyinatı MSK sədrliyi mövzusunu aktuallaşdırıb. “Poliqon.az” saytı xəbər verir ki, dünənə qədər hakimiyyət daxilində ciddi fiqurlardan biri hesab olunan və hakim partiyanın bir nömrəli funksioneri olaraq çıxış edən Tahir Budaqovun gözlənilmədən əsas təsir alətlərindən biri olan Dövlət Statistika Komitəsi sədrliyindən alınması əslidə onun “vurulması kimi qəbul olunur.
Qeyd edək ki, bir neçə ay əvvəl Tahir Budaqov, artıq qocalmış və fəaliyyət funksiyaları kifayət qədər məhdudlaşan Mərkəzi Seçki Komissiyasının sədri Məzahir Pənahovun yerinə əsas namizəd hesab olunurdu. Hətta hakimiyyət kuluarlarında bu məsələ öz həllini tapmış kimi görünürdü və çoxları məhz Tahir Budaqovun yeni MSK sədri olacağına şübhə eləmirdi.
Məlumata görə, MSK sədrliyi o qədər strateji qurumdur ki, bu quruma nəzarət etmək də, hakimiyyət qruplaşmaları üçün bir o qədər strateji əhəmiyyət daşıyır. Xatırladaq ki, MSK heç bir dövlət qurumuna tabe olmayan və ölkədə hakimiyyət instutlarını formalaşdıran bir qurumdur. Hazırda isə bu qurumun yenidən formalaşdırılması qaçılmazdır. MSK sədrliyinə əsas namizədlərdən birinin bu şəkildə zəzərsizləşdirilməsi isə mübarizənin pik səviyyədə olduğundan xəbər verir.
Musavat.com xəbər verir ki, sədr postu ilə bərabər MSK-nın yeni tərkibinin formalaşdırılması üçün hakim partiyanın təqdim edəcəyi siyahıya düşmək üçün də siyasi kulislərdə hərəkətlilik hiss olunmağa başlayıb. Hazırda MSK üzvü olan hakim partiya təmsilçilərinin və bitərəf deputatları təmsil edən üzvlərin əksəriyyətinin yeni tərkibdə olmayacağı məsələsi demək olar netləşib. Bu isə o deməkdir ki, xeyli sayda yer boşalmış olacaq. Təsir gücünü artırmaq istəyən qüvvələrin öz adamlarını həmin yerlərdə əyləşdirmək üçün hərəkətə keçdikləri deyilir. Rəsmi şəkildə hər hansı “mübarizə” elan olunmasa da alt qatda proses gedir, siyahılar tərtib edilir. Milli Məclisin təsdiqinə göndəriləcək siyahı məsələsində kimi tərtib etdiyi siyahıya üstünlük veriləcəyi haqda isə indidən dəqiq fikir söyləmək tezdir.
Azərbaycan qanunvericiliyinə görə, MSK-nın 18 üzvü Milli Məclis tərəfindən təsdiq edilir və yerlər parlamentdə təmsil olunan siyasi qüvvələr arasında bölüşdürülür. Sədr postu da adətən hakim partiyanın təqdim etdiyi namizədə həvalə edilir. Bu baxımdan YAP-ın təqdim edəcəyi siyahı həm siyasi, həm də institusional baxımdan böyük əhəmiyyət daşıyır. Ona görə də MSK sədri postunun gələcək taleyi ilə bağlı hakim partiya daxilində müzakirələr aparılır.
YAP-ın MSK üzvlüyünə təqdim edəcəyi namizədlər siyahısına düşmək üçün partiya daxilində də fəallıq artıb. Partiya strukturlarında, hüquq-mühafizə və seçki administrasiyası sahəsində təcrübəsi olan şəxslərin adları qeyri-rəsmi müzakirələrdə hallanır. MSK üzvlüyü həm siyasi etimad, həm də hüquqi bilik və seçki prosedurlarına dərindən bələdlik tələb etdiyindən namizədlərin seçimi balanslı şəkildə aparılmalıdır. Eyni zamanda, MSK sədri postu sırf texniki vəzifə deyil. Bu vəzifə ölkənin seçki proseslərinin legitimliyi, beynəlxalq müşahidə missiyaları ilə əməkdaşlıq və daxili siyasi sabitlik baxımından strateji əhəmiyyət daşıyır. Buna görə də mümkün namizədlər ətrafında aparılan müzakirələr sırf partiya daxilində deyil, hakimiyyətin yuxarı qatlarında gedir. MSK-nın gələcək tərkibi ilə bağlı qərarın da bu müzakirələrin sonunda veriləcəyi şübhəsizdir. MSK sədri postuna indiyə qədər adı heç zaman hallanmayan şəxsin seçilməsi daha çox ehtimal edilir.
musavat.com
