Avropa Komissiyası Fransanı tullantıların çeşidlənməsi üzrə həddən artıq sərt qaydalarına görə məhkəməyə verəcəyini açıqlayıb. Komissiya hesab edir ki, bu tələblər malların azad hərəkəti prinsipini pozur.
1xeber.media xəbər verir ki, bu barədə "Politico” nəşri məlumat yayıb.
Avrokomissiya bu qərarı Fransaya dəfələrlə edilən xəbərdarlıqlardan sonra qəbul edib. Həmin xəbərdarlıqlarda qeyd olunurdu ki, Fransanın tullantıların çeşidlənməsi üçün tətbiq etdiyi məcburi markalanma Avropa İttifaqının vahid bazar qaydalarına uyğun deyil.
Fransa qanunvericiliyinə görə, qablaşdırma, tekstil, telefonlar və hətta bağ alətləri kimi məhsulların istehsalçıları məhsullar üzərində vətəndaşları düzgün utilizasiya barədə məlumatlandırmaq üçün xüsusi markalanma yerləşdirməlidir. 2022-ci ildə tətbiq olunan bu sistem istehlakçılara məhsulun hansı hissəsinin hansı konteynerə atılmalı olduğunu izah edən simvollardan istifadə edir. O vaxtdan bəri Paris və Brüssel bu məsələ ilə bağlı münaqişə vəziyyətindədir.
Brüssel bütün Aİ üzrə markalanma qaydalarının uyğunlaşdırılmasına çalışır. Ötən il Avropa İttifaqı yeni qablaşdırma qaydaları qəbul edib. Bu qaydalara əsasən, Aİ bazarında satışa çıxarılan bütün qablaşdırmalarda istehlakçılar üçün çeşidlənməni asanlaşdırmaq məqsədilə material tərkibi haqqında məlumat verən "uyğunlaşdırılmış etiket” olmalıdır. Lakin bu tələblər yalnız 2028-ci ilin avqustunda qüvvəyə minəcək.
Avropa Komissiyası bildirir ki, Aİ səviyyəsində vahid qaydalar qüvvəyə minənə qədər milli səviyyədə konkret markalanmadan məcburi istifadə "proporsional olmayan” tədbirdir və malların azad dövriyyəsi üçün "maneə” yaradır.
Şirkətlər uzun müddətdir ki, Aİ-yə üzv ölkələrdə tullantı markalanması üzrə müxtəlif milli tələblərin məhsulların satışı üçün xərcləri artırdığını və prosesi çətinləşdirdiyini bildirirlər. Onların sözlərinə görə, hər ölkənin qaydasına uyğun fərqli qablaşdırma tərtib etmək zərurəti biznesi yükləyir.
