Rusiyalı turoperatorlar rus turistlərin ölkəyə buraxılmaması ilə bağlı Meksika hakimiyyətinə müraciət ediblər.
RBC xəbər verir ki, Meksika səfirinə kollektiv müraciəti 14 turoperator imzalayıb.
Turizm şirkətlərinin məlumatına görə, Rusiya Federasiyasından gələn turistlərin ölkəyə girişinə icazə verilməməsi hallarının sayı ümumi turist axınının 10%-nə çatıb.
Bildirilir ki, turistlərin bütün lazımi sənədləri - mehmanxana rezervasiyası, gediş-dönüş biletləri, təsdiqlənmiş tur ödənişləri olsa belə, ölkəyə girişinə icazə verilmir.
Nümayəndələr onu da qeyd ediblər ki, bu problem 6 ay əvvəl yaranmağa başlayıb və hazırda turistlər arasında bu istiqamətə tələbat azalıb. Mütəxəssislər qeyd edirlər ki, turistlər öz tətillərini və pullarını riskə atmaq istəmirlər, çünki sərhəd xidməti ölkəyə girişdən imtina edərsə, turoperator məsuliyyət daşımır.
