Son 7 ildə Azərbaycanda əmək pensiyaçılarının sayında 216.6 min nəfər azalma qeyd alınıb. Belə ki, Əmək və Əhalinin Sosial Müdafiəsi Nazirliyinin məlumatına görə, 2017-ci ildə 1 315 229 nəfər əmək pensiyası alıb. Həmin ildən etibarən əmək pensiyası alanların sayı sürətlə azalmağa başlayıb. Bu rəqəmlər yenidən müzakirələrə yol açıb. Azalma tendensiyasının davam edəcəyi düşünülür.
Bununla necə mübarizə aparmaq lazımdır? Pensiyaçıların sayı niyə azalır?
1xebermedia xəbər verir ki Globalinfo.az-a danışan iqtisadçı Xalid Kərimli deyib ki, ölkədə əmək pensiyaçılarının sayının azalmasının əsas səbəbi pensiya yaşının uzadılmasıdır:
“Əvvəl qadınlarda pensiya yaşı 60, kişilərdə isə 62 yaş idi. Lakin 2017-ci ildə qəbul edilmiş qanunverciliyə görə, kişilərin pensiya yaşı həmin dövrdən hər il 6 ay uzadılmaqla 65-ə, qadınların isə 60 yaşdan sonra hər il 6 ay uzadılmaqla 65 yaşa çatdırılması nəzərdə tutuldu. Kişilərdə artıq pensiya yaşı 65, qadınlarda 64-dür. 2027-ci ilə qədər qadınların da pensiya yaşı kişilərlə eyniləşəcək. Təbii ki, sözügedən qərar pensiyaçıların sayına təsir göstərir”.
İqtisadçı bildirib ki, pensiya ilə bağlı dünya təcrübəsi fərqlidir:
“Avropada pensiya yaşı 65-dir. Amma orada gözlənilən ömür müddəti 81-82 ildir. Azərbaycanda isə bu, 74-75 yaşdır. Son 7-8 ildə insanların ömür müddəti çox dəyişməyib. Açığı, kişilərlə qadınların pensiya yaşının eyniləşdirilməsinin tərəfdarıyam. Burada problem yoxdur. Həm də qadınların gözlənilən ömür müddəti daha uzundur, nəinki, kişilərin. Lakin pensiya yaşının 62 olması daha ədalətli olardı”.
