1xeber.media Globalinfo.az-a istinadla İşgəncələrə Qarşı Azərbaycan Komitəsinin hüquq şöbəsinin rəisi Rövşən Məmmədovla müsahibəni təqdim edir:
– Rövşən bəy, bildiyimiz qədər tez-tez bölgələrə səfər edir, polis şöbələrində olur, məhbuslarla görüşlər keçirirsiniz. Ən son nə vaxt monitorinq keçirmisiniz?
– Mart ayının 10-dan 19 rayonumuzda monitorinq aparmışıq. Bu günlər ərzində Hacıqabul, Şirvan, Kürdəmir, Ucar, Yevlax, Gəncə, Şəmkir, Tovuz, Gədəbəy, Bərdə, Tərtər, Mingəçevir, Xankəndi, Ağsu, Göyçayda və başqa rayonlarda monitorinq keçirdik.
– Monitorinq zamanı hansı problemlərlə qarşılaşdınız?
– Bu rayonlarda ən çox inzibati həbslərin olduğunu öyrəndik. Səbəb isə alimentlərlə bağlı idi. Rayonların əksəriyyətində alimentə görə olan həbslər təkrar idi.
– Həbslər neçə müddətlik olur?
– Qanunvericiliyə uyğun olaraq inzibati həbslərdə 2 dəfə 15 gün, sonra 1 ay, hətta cinayət işi də qaldıra bilərlər.
– Alimenti ödəmək üçün şəxs dərhal həbs olunur, yoxsa vaxt verilir?
– Onlara bir həftə şans yaradılır ki, iş tapıb, işləsinlər. Lakin təəssüf ki, iş tapılmır.
– İş tapa bilməyən şəxs alimenti necə ödəməlidir bəs?
– Hökumətə təklif edirik ki, aliment ödəyə bilməyənləri məcburi əməyə cəlb etsinlər. Bundan sonra da maaşlarından alimentin məbləği ödənilsin.
– Aliment borcları nə qədər olur?
– Elə ata var ki, 6-7 min aliment borcu toplanıb. Nə qədər olmasa bu uşaq da böyüməlidir, yaşamalıdır. Ümid edirəm ki, məcburi əməklə bağlı təklifimizə müsbət cavab alarıq.
– Bir çoxları boşanmanın artmasında qadınları günahlandırır ki, aliment alıb, rahat yaşamaq üçün boşanırlar. Sizcə, boşanmaların sayı niyə bu qədər artıb?
– Mən belə düşünmürəm. Çünki aliment maksimum 235 manatdır və ya digər şəxsin maaşı çoxdursa, onun 1/4 hissəsi alimentə ayrılır. Bu da 500-700 manat civarında olur. Əgər qadın boşanmasa, kişinin maaşı cəm şəkildə evə gələrsə, onda qadın niyə 235 manata görə boşansın? Yanlış yanaşmadır.
– Evlənmədən öncə nikah müqaviləsi olmalıdırmı?
– Fikrimcə, hər şeydən öncə müəyyən bir qurum yaranmalıdır ki, gənclər ailə qurmadan əvvəl evliliklə bağlı söhbətlərə cəlb olunub, məsuliyyəti dərk etsinlər. Həmin qurumda psixoloqlar gənclərlə söhbət aparsa, xasiyyətlərinin uyğun olub-olmamasını desə, birlikdə bu yola çıxıb-çıxa bilməmələri haqqında söhbətlər etsə, daha yaxşı olar.
– Belə bir qurumun yaradılması evlənmə sayının azalmasına gətirib çıxarmaz?
– Azalmağa doğru gedəcəyini düşünmürəm. Belə bir qurum boşanmanın qarşısını almaqda köməklik göstərmiş olar. Əksinə, sağlam ailə görə bilərik.
– Rövşən bəy, aliment 235 manat olduğu halda bəzi bölgələrimizdə hakim 86 manat aliment təyin edir. Bu, nə dərəcədə doğru və ədalətli qərardır?
– O şəxslər yenidən məhkəməyə müraciət edib, alimentin artırılmasını tələb etmə hüququna malikdirlər. Ola bilər, həmin hakim məsələyə qərəzli yanaşıb. İnanıram ki, məhkəməyə təkrar müraciət olunduqda məsələyə şəffaf baxılacaq.
– Sizcə, 235 manatla bir övladı böyütmək mümkündürmü?
– Çətindir… Bilirsiniz, valideyn də bunları düşünməlidir. Adam var ki, təyin olunan 235 manatdan əlavə də övladı üçün nələrsə edir. Amma ümumilikdə 235 manat az məbləğdir.
