ABŞ Prezidenti Donald Trampın dünya ölkələrinə qarşılıqlı tariflərlə bağlı sərəncamı bir çox aspektdən diqqət çəkib. Xüsusilə siyahıda adları yer alan dövlətlərə fərqli rüsumların müəyyənləşdirilməsi müzakirə edilir. Məsələn, Çinə 34 faiz, Avropa İttifaqına (Aİ) 20 faiz, İsrailə 17 faiz gömrük rüsumu tətbiq olunacaq. ABŞ prezidenti ən aşağı gömrük rüsumunu Türkiyə, İngiltərə, Səudiyyə Ərəbistanı və Misirə tətbiq edib. Ekspertlər sözügedən qərarı “Gömrük savaşı” kimi dəyərləndiriblər.
Bu proses dünyaya nə vəd edir? ABŞ-ın ölkə seçimləri necə dəyərləndirilməlidir?
İqtisadçı Natiq Cəfərli deyib ki, ABŞ-ın müəyyən etdiyi yeni tariflər dünya iqtisadiyyatına təsir edəcək:
“Ən azı “tarif müharibəsi” istehsakçıların başında çartlayacaq. Çünki məhsulların dəyəri artacaq, bu da inflyasiyanın yüksəlməsinə səbəb olacaq. Sözügedən qərarın isə ABŞ üçün daha az təsiri var, nəinki, dünya…Digər ölkələrdə yaxın zamanlarda ciddi təsirlərin şahidi olacağıq”.
İqtisadçı bildirib ki, Azərbaycanla ABŞ arasında ticarət dövriyyəsi yüksək rəqəmlərlə ifadə olunmur:
“Ölkəmizdən ABŞ-a ixrac edilən məhsulların həcmi də çox deyil. Vaşinqton bizim ticarət tərəfdaşlarımızın ilk 15-liyinə belə daxil olmur. Düşünmürəm ki, Azərbaycan iqtisadiyyatında hansısa dalğalanmalar yaransın. Digər tərəfdən, ABŞ bizə daha çox məhsul satır, nəinki əksi. Bu nöqteyi-nəzərdən Azərbaycan da məhsulların tariflərini 10 faiz artırsa, bu, nə qədər qəribə səslənsə də, ölkəmizə xeyir gətirə bilər. O ki qaldı tariflərlə bağlı ölkə seçimlərinə, Türkiyə və İngiltərə ilə ABŞ-ın özəl münasibətləri var. Bu yerlərdən daha çox komplektləşdirici məhsullar alınır. Vaşinqton özünə sərf edən yolu seçir”.
Globalinfo.az
