Azərbaycan tərəfi ilə müzakirələrə əsasən, gələn 2 ay ərzində Astarada İran-Azərbaycan sərhədində istifadəyə verilən yeni körpüyə bitişən yeni avtomobil yolunun istifadəyə verilməsi planlaşdırılır.
1xeber.media məlumatına görə, bunu İranın yol və şəhərsalma nazirinin müavini və İranın Yol və Nəqliyyat Təşkilatının sədri Rza Əkbəri yerli mediaya açıqlamasında deyib.
Onun sözlərinə görə, ötən ildə bu magistral yolun bir hissəsi istifadəyə verilmiş və yük maşınları və tranzitin bir hissəsi bu istiqamətlə daşınırdı. 4 zolaqlı yeni avtomobil yolunun istifadəyə verilməsi ilə 1,4 kilometr uzunluğunda keçid yolu bu istiqamətə yönəldiləcək.
Nazir müavini deyib ki, Azərbaycan-İran İqtisadi Əməkdaşlıq üzrə Hökumətlərarası Birgə Komissiyasının iclasında bu layihə üzrə işlərin sürətləndirilməsinin vacibliyi qeyd olunub.
Əkbəri bildirib ki, İranın Astara rayonunda həyata keçirilməkdə olan iki önəmli layihədən biri qeyd olunan avtomobil yolu, ikincisi isə yeni yük terminalıdır. Bu yük terminalı 6 hektar ərazidə inşa olunacaq. Ərazinin mülkiyyəti artıq satın alınıb və tezliklə tikinti işlərinə başlanacaq. Bu yük terminalının bir neçə mərhələdə istifadəyə verilməsi nəzərdə tutulub.
Qeyd edək ki, bu ilin 21 və 22 yanvarda Tehranda İran və Azərbaycan Birgə İqtisadi Komissiyanın 16-cı iclası keçirilib. İclasın sonunda iki ölkə arasında əməkdaşlıq sənədi imzalanıb.
Əlavə edək ki, İran Astarada 1 il ərzində yük terminalının istifadəyə verilməsi istiqamətində səylər göstərir.
Qeyd edək ki, Azərbaycan və İran arasında Astaraçay üzərində yeni körpünün təməli 25 yanvar 2022-də qoyulub. Körpü 3 aşırımlı olmaqla uzunluğu 97.5 metr, eni isə 30.5 metrdir. 4 hərəkət zolaqlı körpüdə əlavə olaraq ehtiyat hərəkət üçün daha 2 zolağın, həmçinin hər birinin eni 2.5 metr olan 2 piyada keçidinin yaradılması nəzərdə tutulub. Körpünün tikintisinə 5,8 milyon avro vəsait xərclənib. Bu körpü 30 dekabr 2023-də istifadəyə verilib.
