Ötən ilin sonu Azərbaycan Mərkəzi Bankının (AMB) sədri Taleh Kazımov 2025-ci ildə ölkədə devalvasiyanın gözlənilmədiyini bildirmişdi. Amma bu, ABŞ Prezidenti Donald Trampın gəlişindən öncəki proqnoz idi. Hazırda isə Ağ Evin son tarif-gömrük qərarları fonunda qlobal iqtisadiyyatın çökəcəyi, hətta bunun valyuta müharibələrinə yol açacağı iddia edilir.
Mövcud proses manata necə təsir edəcək? Azərbaycanda banklara dollar satışının həcmində, məbləğində nə kimi dəyişikliklər var?
İqtisadçı Əkrəm Həsənov deyib ki, hazırda müşahidə olunan vəziyyətlə bağlı heç kəs dəqiq nəsə deyə bilməz:
“Azərbaycanda milli valyutanın məzənnəsi bazar deyil, inzibati yolla müəyyən olunur. Gərək vəsait, valyuta ehtiyatları olsun. Bunun hesabına Azərbaycan Mərkəzi Bankı bir müddət hətta bazar konyunkturası, valyuta ehtiyatlarımızın azalması, neftin ucuzlaşması və sair hallara baxmayaraq, sabitliyi saxlaya bilər. Necə ki, 2014-cü ildə bunu etdi. Lakin 2015-ci ilin fevralında devalvasiyaya getməyə məcbur oldu. Ona görə də heç kim deyə bilməz ki, 2025-ci ildə devalvasiya olacaq. Hətta vəziyyət lap pis olsa belə, Azərbaycanın kifayət qədər valyuta ehtiyatları var”.
İqtisadçı bildirib ki, indi gedən proseslər neftin qiymətinin düşdüyünü göstərir:
“Dünyada nə baş verməsindən asılı olmayaraq, Azərbaycan iqtisadiyyatı primitivdir. Yəni biz yalnız neft və qazın qiymətindən asılıyıq. Ancaq neftin dəyər itirməsi bizim üçün pisdir və əlbəttə, devalvasiya təhlükəsi var. Azərbaycanı yaxın 3-5 il ərzində onsuz da devalvasiya gözləyir. Çünki neft hasilatımız azalır, hətta qiymətlər yüksək olsa da, az satırıq. Belə olan halda, valyuta ehtiyatlarımız azalacaq və devalvasiyaya gedəcəyik. Bunun hansı ildə baş verəcəyini dəqiq deyə bilmərik. Hələlik isə bizdə dollar alış-verişində vəziyyət sabitdir”.
Globalinfo.az
