Son zamanlar pullarını banka qoyan vətəndaşların sayında artım müşahidə olunur. Məlumdur ki, əmanətlərin müxtəlif növləri mövcuddur və hər biri müəyyən faizlərlə təklif edilir. Xüsusilə depozitlərdən qazanılan məbləğlərlə bağlı suallar zaman-zaman gündəmə gəlir.
Pul vəsaiti nə zaman banka yerləşdirilsə, daha çox gəlir gətirər?
İqtisadçı Elçin Rəşidov deyib ki, vətəndaşlar gəlir əldə etmək istəyirsə, təbii ki, daha çox faiz təklif edən banklara vəsait yerləşdirməlidir:
“Əsas müzakirə edilən məsələlərdən biri də valyutanın növüdür. Belə ki, dolların dəyər itirməsi gözlənilir. Belə olan halda, manat da onunla birlikdə zəifləyəcək. Məsələn, dollarla investisiya qoyursunuz, sizə illik 2 faiz vəd edirlər, amma il ərzində özü 10 faiz dəyər itirəcək. Bu zaman siz də qazanmırsınız. Çünki depozitin üzərinə gələn faiz gəlirləri dolların itirəcəyi dəyərdən aşağıdır. Manata gəldikdə, bizdə qəribə məzənnə siyasəti həyata keçirilir. Görürsünüz, dollarla manata təyin olunan əmanət faizləri arasında fərq var. Bu onu göstərir ki, valyutalar arasında arbitraj mövcuddur və belə yerdə iqtisadi zərər qaçılmazdır. Əsas odur ki, manatda təklif edilən faiz daha yüksəkdir”.
İqtisadçı bildirib ki, müxtəlif banklar uzun müddətə nisbətən daha yüksək faiz təklif edirlər:
“Lakin uzun müddətə əmanətini yerləşdirənlər daha çox risklə qarşı-qarşıyadır. Düzdür, vətəndaşın müddətdən əvvəl əmanətini çıxarmaq imkanı var. Bu zaman nisbətən aşağı faizlərdən yararlanmış olur. Yəni şəxs seçim etməlidir.
Təəssüf ki, valyuta bazarı və ümumiyyətlə, məzənnə kursunu gələcəkdə böyük dalğalanma gözləyir. Buna ABŞ-ın siyasəti təsir edəcək. Bu da əmanətçilər üçün təhlükə deməkdir”.
Globalinfo.az
