Polis Balakəndə 6 kq-dan artıq narkotik vasitə aşkarlayıb.
1xeber.media DİN-in Mətbuat xidmətinin Şəki regional qrupuna istinadən xəbər verir ki, keçirilən tədbirlərlə əvvəllər də narkotiklərin qanunsuz dövriyyəsi ilə məşğul olduğuna görə dəfələrlə məhkum olunmuş 40 yaşlı Elnur Yekəyev saxlanılıb. Onun üzərində 4 kiloqramdan artıq marixuana və elektron tərəzi aşkarlanıb.
Saxlanılan şəxs narkotiklərin bir hissəsini isə Günel adlı şəxsdən aldığını bildirib. Davam etdirilən tədbirlərlə etdiyi qanunsuz əməllərə görə axtarışda olan Günel İbişovanın yeri polislər tərəfindən müəyyən olunub və həmin şəxs saxlanılıb. Onun yaşadığı ünvandan torpağa basdıraraq gizlətdiyi 2 kiloqram 700 qram marixuana və 2412 ədəd metadon həbi aşkarlanıb. G.İbişova narkotik vasitələri şəxsiyyəti istintaqla araşdırılan İran vətəndaşından əldə etdiyini deyib.
Faktla bağlı cinayət işi başlanılıb, hər iki şəxs barəsində məhkəmənin qərarı ilə həbs qətimkan tədbiri seçilib.
***
Günel İbişovanın əri – “Çopu” ləqəbli Cavidan İbişov bir müddət əvvəl narkotik vasitələrlə bağlı cinayətlərə görə həbs edilib.
Müəyyən edilib ki, o həbsdə olduğu müddətdə Bakı şəhərində və ətraf rayonlarda narkotik tədarükünü, daşınmasını və satışını arvadı - “Ana” ləqəbli Günel İbişovanın vasitəsilə həyata keçirməyə başlayıb və ona daim tapşırıqlar verərək istiqamətləndirib.
O da məlum olub ki, bir müddət əvvəl Cavidanın atası Əhmədağa İbişov cəzaçəkmə müəssisəsində oğlunu ziyarətə gedərkən ona narkotik vasitə ötürməyə çalışıb və buna görə məsuliyyətə cəlb edilib.
