Bazarlarda bir çox kənd təsərrüfatı məhsulunun qiyməti ötən ayla müqayisədə azalıb. Amma təcrübə onu göstərir ki, ucuzlaşma davamlı olmur. Hətta havaların getdikcə istiləşməsinə baxmayaraq, qiymətlər yenidən qalxa bilir.
1xeber.media xəbər verir ki, bu sözləri iqtisadçı Rəşad Həsənov Baku TV-yə müsahibəsində deyib.
O, qiymətlərə təsir göstərən əsas amillər kimi iqlim dəyişikliklərini, quraqlığı, məhsuldarlığın azalmasını və ixrac bazarlarında yaranan kəskin tələbi qeyd edib:
"Məsələn, Azərbaycan kənd təsərrüfatı məhsullarını əsasən Rusiyaya ixrac edir. Orada müəyyən səbəblərdən hansısa məhsula tələbatın kəskin artması Azərbaycandan həmin məhsulun ixracının intensivliyini artırır. Bu da daxili bazarlarda təklif qıtlığına və qiymət artımına gətirib çıxarır. Xarici bazarlara məhsullarına çıxarılmasındakı çətinliklər yerli bazarda qiymətlərin enməsini şərtləndirir. Digər tərəfdən kənd təsərrüfatı sahəsində risklərin yüksək olması qiymət dəyişkənliyini labüd edir".
