DİM-in II və III ixtisas qrupları üzrə qəbul imtahanlarının ilk mərhələsi qalmaqalla fərqləndi. Xüsusilə tarix müəllimləri və abituriyentlər suallardan narazı qaldı. Hesab olunur ki, tarux sualları xeyli mürəkkəbləşdirilib. Konkret səhvlər də var. Bizimyol.info bu haqda yazmışdı. Suallardan birində cavab variantı tamamilə yanlışdır və abituriyentlərin xeyrinə qərar verilməlidir.
II və III ixtisas qrupları üzrə ikinci cəhd üçün qeydiyyat başlayıb. Nəticəsindən narazı olan abituriyentlər iyulun 6-da yenə bəxtini sınayacaq. İlk mərhələdə 54 mindən çox abituriyentin biliyini yoxladığı məlumdur. İkinci cəhd üçün qeydiyyat başa çatmadığından, onların nə qədərinin yenidən imtahanda iştirak edəcəyini bilmirik. Amma ehtimal olunur ki, 40 mindən çox abituriyent daha yüksək bal toplamağa çalışacaq.
Bizimyol.info xəbər portalı xəbər verir ki, DİM sualları çətinləşdirməkdə ittiham olunur. Tarix müəllimləri bununla bağlı sosial mediada etiraz yazıları yerləşdirirlər. Onlar hətta DİM rəhbərliyinə müraciət də ünvanlayıb. Müəllimlər hesab edir ki, suallar adekvat təşkil olunmayıb, proses abituriyentlərin həvəsdən düşməsi ilə nəticələnir. DİM-in rəhbəri Məleykə Abbaszadənin son açıqlaması göstərir ki, mərkəz geri çəkilmək fikrində deyil. Çünki o, I və IV ixtisas qrupları üzrə imtahanların da bu çətinlikdə suallarla keçiriləciyini dilə gətirib.
DİM nədə ittiham olunur? Abituriyentləri ikinci cəhdə məcbur etməkdə. Tələbə adını qazanmaq istəyənlər daha bir cəhd üçün 50 manat ödəməli olur. İlk imtahanda nəticə yaxşı olanda abituriyentlər, adətən, bir daha gücünü sınamağa ehtiyac duymur. Lakin ilk cəhd zamanı çətinliklə üzləşdiklərindən, 50 manatından keçməli olacaqlar. Abituriyentləri və valideynləri qəzəbləndirən də budur. Aylarla, illərlə çəkilmiş əziyyət boşa gedir. Üstəlik, əlavə xərc yaranır. İlk mərhələdə sualların mürəkkəbləşdirilməsi ikinci cəhdə ehtiyac duyanların sayını artırır. Təkcə II və III ixtisas qrupu üzrə iştirakçılar ümumilikdə 2 milyon manat civarında xərcə düşəcək. Hələ qarşıda digər ixtisas qruplarının imtahanları var.
DİM-in reaksiyası göstərir ki, etirazlara məhəl qoyulmur. I və IV ixtisas qruplarında da problemlərin olacağını indidən ehtimal etmək mümkündür.
