AMEA-da innovativ və multidisiplinar tədqiqatların genişləndirilməsi istiqamətində ardıcıl islahatlar həyata keçirilir. Bu tədbirlər yüksəkixtisaslı kadrların hazırlanmasını və dünyanın aparıcı elmi prioritetlərinə uyğun yeni istiqamətlərin formalaşdırılmasını əsas hədəf kimi müəyyənləşdirib. Görülən işlər və əldə olunan uğurlar nüfuzlu beynəlxalq elmi dairələrin də diqqətini cəlb edir.
1xeber.media xəbər verir ki, bu istiqamətdə AMEA Folklor İnstitutunun aparıcı elmi işçisi filologiya elmləri doktoru Səfa Qarayevin tədqiqatları da beynəlxalq səviyyədə maraq doğurub. Onun “Folklorda metaforik düşüncənin psixoanalitik semantikası” mövzusunda hazırladığı dissertasiyanın ingilis dilindəki avtoreferatı ABŞ-ın tanınmış folklorşünası, Binhemton Universitetinin professoru Elizabet Tukerə təqdim edilib. Professor Elizabet Tuker elmi xülasəni yüksək qiymətləndirərək doktoranta xüsusi təşəkkür məktubu göndərib. Məktubda bildirib: “Dissertasiyanızın ingiliscə xülasəsini oxudum və yanaşmanızın dərin erudisiyası və düşüncə incəliyi məni çox təsirləndirdi. Metaforik düşüncənin psixoanalitik semantikası olduqca maraqlı və aktual bir mövzudur. Alan Dundesin tədqiqatlarına istinad etməyiniz də sevindiricidir. Əminəm ki, Alan Dundes sağ olsaydı, bu əsəriniz onu çox maraqlandırardı”.
Professor Elizabet Tuker avtoreferatda yer alan “süd və bal axan məkan” ifadəsinin Bibliya ədəbiyyatındakı önəmini xüsusi vurğulayıb və bu semantik yanaşmanın dəyərini qeyd edib. O, həmçinin tədqiqatda təqdim olunan nümunələrin uğurla seçildiyini, xüsusilə də uyğur epik dastanında qurd obrazının Edipal fiqur kimi təhlilini yüksək qiymətləndirib: “Təhlilinizdəki nümunələr çox yaxşı seçilib. Uyğur epik dastanında vəhşi heyvanın Edipal obraz kimi təhlili məni xüsusilə heyran etdi. Bu mühüm elmi nailiyyətiniz münasibətilə sizi təbrik edir, gələcək fəaliyyətinizdə uğurlar arzulayıram”.
Qeyd edək ki, professor Elizabet Tuker ABŞ-da folklorşünaslıq sahəsində nüfuzlu alimlərdən biridir. O, uşaq folkloru, şəhər əfsanələri, xalq inanc sistemləri və virtual folklor mövzularında dəyərli elmi əsərlərin müəllifidir.
