Fövqəladə Hallar Naziriliyi (FHN) Tikintidə Təhlükəsizliyə Nəzarət Dövlət Agentliyinin Tikilməkdə olan Obyektlərin Birləşmiş Müdriyyəti Ağsu və İsmayıllı rayonlarında 2 ədəd 3 otaqlı fərdi yaşayış evi inşa edəcək.
1xeber.media xəbər verir ki, qurum artıq bununla bağlı elan etdiyi tenderə yekun vurub. Tenderin qalibi "Baku Building” şirkəti seçilib.
Tərəflər arasında bağlanacaq satınalma müqaviləsinin maliyyə dəyəri 183 193,7 manatdır. Beləliklə, aydın olur ki, inşa ediləcək bir ev 91 596,85 manata başa gələcək.
"Baku Building” MMC 14 yanvar 2019-cu ildə qeydiyyata alınıb. Nizamnamə kapitalı 10 AZN-dir. Şirkətin qanuni təmsilçisi Hüseynov Samir Rafiq oğludur.
Şirkət barəsində açıq mənbələrdə heç bir məlumat yoxdur. Samir Hüseynovun isə vaxtilə Xızı Rayon İcra Hakimiyyətində çalışdığı bildirilir. Bu barədə mediada da məlumatlar yer alıb.
