Xaçmaz və Siyəzən rayonlarında MİQ imtahanından yüksək nəticə əldə edən müəllimlər belə məktəblərdə işlə təminedilmədə problemlərlə üzləşirlər.
1xeber.media xəbər verir ki, bu barədə politoloq Elxan Şahinoğlu sosial şəbəkə hesabında yazıb.
O, universitetdə dərs dediyi fəal tələbələrini bu qeyri-şəffaf prosesin zərərçəkənlərindən biri olduğunu vurğulayaraq, aidiyyati qurumun məsələyə münasibət bildirəcəyini bildirib:
"Qərb Universitetində dərs deyərkən fəal tələbələrim içərisində Orxan Kərimovu qeyd etmək istəyirəm. Universitetdə təsis etdiyimiz Tətbiqi Politologiya Mərkəzinin fəal üzvlərindən idi, hər dəfə əlində maraqlı kitabla qatılardı müzakirələrimizə. Orxanın arzusu anadan olduğu Xaçmaza qayıdıb məktəbdə tarixdən dərs demək idi. Onun savadına bələd olduğumdan məktəbdə tarix müəllimi düzələcəyinə şübhəm yox idi. Ancaq Orxanla hər dəfə əlaqə saxladıqda müxtəlif maneələrlə üzləşdiyini öyrəndim. Mənə bunları yazıb:
“Elxan müəllim, MİQ imtahanında region üzrə 84 bal ilə ən yüksək nəticə göstərən müəllim idim (bir nəfər sonradan Xaçmaza 86 bal ilə yerdəyişmə etmişdi), ancaq daimiləşə bilmədim bu bal ilə. Səbəb də Quba-Xaçmaz regional təhsil idarəsinin anlaşılmaz qərarları oldu. Xaçmaza yaxın kəndlər, Xaçmazın özündə tarix müəllimliyi üçün boş yerlər var idi, ama o yerlər vakansiyaya çıxarılmadı. Bununla bağlı Xaçmaz rayon təhsil idarəsinə müraciət etdim. Onlar da cavabında “həmin yerlərin 7,8 nömrəli məktəblərin lisey ediləcəyini və həmin məktəblərdəki boş yerlərin də 7,8 nömrəli məktəblərin müəllimləri üçün "bron edildiyini”dedilər. Niyə məhz Xaçmaza yaxın yerlər və Xaçmazın özündə olan yerlər həmin müəllimlər üçün bron edilir, ama MİQ-dən yüksək nəticə göstərmiş müəllimlər üçün vakansiyaya 8 saatlıq, Xaçmazdan uzaq 9 illik 12-13 saatlıq məktəblər vakansiyaya çıxarıldı?! Niyə həmin müəllimlər MİQ imtahanı vermədən Xaçmaza yaxın, dərs saatı yüksək məktəblərdə daimiləşdirilir (bu hadisə bu Siyəzən rayonunda da baş verdi). Hər halda illərin müəllimidirlər, MİQ-dən qorxacaq deyillər. Əlavə olaraq da liseyə çevrilən məktəblərə müəllim qəbulu da qeyri-şəffaf formada keçirilib. Qeydiyyatdan keçmiş, tələblərə cavab verən bir çox müəllim müsahibəyə çağrılmadan, özləri kefləri istəyən müəllimləri həmin liseylərdə işə qəbul ediblər. Bu da açıq şəkildə təhsilə və gənc müəllimlərə qarşı qeyri-şəffaf və özbaşına münasibətin göstəricisidir”.
Elm və Təhsil Nazirliyinin Orxan Kərimovun qaldırdığı məsələyə münasibət göstərəcəyinə ümid edirəm".
