Bakının Bilgəh qəsəbəsində illərdir davam edən torpaq davası bitmək bilmir. Məsələnin mərkəzində sabiq deputat Hacı Qalib Salahzadə dayanır.
Hacı Qalib Salahzadə deyib ki, adını çəkmək istəmədiyi generalla 30 ilə yaxındır məhkəmələrdə çəkişib:
“Həmin general bir şey edə bilmədi, indi də Qod Nisanovu qabağa veriblər, onun “podstavnoy” adamının əli ilə torpağı ələ keçirmək istəyirlər. Mən də məcbur olub Bakıdakıları qoyub Moskvadakılarla döyüşürəm”.
Söhbət Bilgəh qəsəbəsində yerləşən, sovet dövründən qalma böyük bir bağ sahəsindən gedir. İddialara görə, bu torpaq sahəsinin ilk sahibi vaxtilə Rəsul Quliyev olub. Lakin sonradan həmin ərazi üzərində mülkiyyət hüququnu Hacı Qalib Salahzadə və onun ailəsi də irəli sürüb.
Hacı Qalib Salahzadə və onun qohumları torpaq sahəsinin onlara vərəsəlik və mülkiyyət hüququ əsasında çatdığını sübut edən sənədləri təqdim etdiklərini deyirlər.
Ötən il Hacı Qalibin xalası Lətifə Əliyeva Prezident Administrasiyasının rəhbəri Samir Nuriyevə rəsmi məktubla müraciət edib. Həmin məktuba Hacı Qalibin dayısı, 1945-ci il təvəllüdlü Əminağa Camalov imza atıb.
Əminağa Camalov yazır ki, anası Kübra Mirəbdül Hüseyn qızı Camalovaya məxsus olmuş və vərəsəlik üzrə ona çatan bağ sahəsinə 26 ildir daxil ola bilmir:
“Bağa girişə qadağa qoyulub, məcbur olub redaksiyalara müraciət etmişəm. 2009-cu ildə Sabunçu Rayon Məhkəməsində hakim Nilufər Cəfərlinin sədrliyi ilə bu işə 3 dəfə baxılıb. Daha sonra Bakı Apellyasiya Məhkəməsinin hakimi Etibar Nəbiyev “zakaz” qəbul edərək, artıq qüvvəyə minmiş qərarı ləğv edib. Halbuki həmin qərar Sabunçu Rayon Məhkəməsinin hakimi Rahib Salmanov tərəfindən çıxarılmış və 7 ay öncə qüvvəyə minmişdi”.
Camalovun sözlərinə görə, həmin dövrdə apellyasiya instansiyasında qərarın dəyişdirilməsinə “bir generalın şəxsi müdaxiləsi” səbəb olub.
Əminağa Camalov məktubunda sensasion iddialar da səsləndirib:
“Bu, 60 sot torpaq davası deyil. Söhbət 25 milyon dollarlıq ərazidən gedir”.
Ə.Camalovun sözlərinə əsasən, 2009-cu ildə məhkəmə materialları aydın şəkildə göstərir ki, mübahisəli torpaq sahəsi Rəsul Quliyevə deyil, Abşeron rayonuna aid ərazidə yerləşir və sənədlər Hacı Qalib Salahzadənin ailəsinə məxsusdur.
Musavat.com
