Dünyanın bir sıra ölkələrində aviaşirkətlər kütləvi gecikmələr və reys ləğvləri ilə üzləşiblər.
1xeber.media xəbər verir ki, buna səbəb "Airbus"un minlərlə təyyarəni uçuş idarəetmə sisteminin proqram təminatının yenilənməsi üçün geri çağırması olub.
Yaponiyada "All Nippon Airways" aviaşirkəti təxminən 100 daxili reysi ləğv etməyə məcbur qalıb.
Nəticədə 13 minədək sərnişin çətinliklə üzləşib. Fransada isə sosial şəbəkə istifadəçiləri hava limanlarında kilometrlərlə uzanan növbələrdən, üç saata çatan gözləmələrdən və dolan terminallardan şikayətlənirlər.
Xarici KİV-in məlumatına görə, geri çağırılan təyyarələr əsasən "Airbus" A320 modelləridir.
Dünyadakı A320 parkının demək olar ki, yarısı, 6 mindən çox təyyarə proqram təminatının yenilənməsinə ehtiyac duyur. Bunun səbəbi aşkar edilmiş kritik zəiflikdir. Belə ki, güclü günəş radiasiyası uçuş idarəetmə sisteminin düzgün işləməsi üçün həyati əhəmiyyət daşıyan məlumatları zədələyə bilər.
"Airbus" və aviaşirkətlər problemin aradan qaldırılması və uçuş cədvəlinin sabitləşdirilməsi üzərində çalışdıqlarını bildiriblər.
