Elm və Təhsil Nazirliyi (ETN) daha bir nilyonluq tenderə yekun vurub.
1xeber.media Tribuuna.az-a istinadla xəbər verir ki, nazirliyin Təsərrüfat Hesablı Əsaslı Tikinti və Təchizat İdarəsi Respublika üzrə bir sıra məktəbəqədər və ümumtəhsil müəssisələrində təmir, kommunal-kommunikasiya və abadlıq işləri həyata keçirəcək.
Bu məqsədlə “S.H. İNŞAAT XİDMƏTİ” MMC ilə satınalma müqaviləsi bağlanılıb. Açıq mənbələrdə qeyd edilir ki, tərəflər 9 milyon 226 min 796 manata anlaşıblar.
Açıq mənbələr üzərindən aparılan araşdırma zamanı məlum olub ki, “S.H. İNŞAAT XİDMƏTİ” 2024-2025-ci illər ərazində ETN-in 4 tenderinin qalibi olub.
Belə ki, təkcə bu ilin oktyabrında nazirlik “S.H. İNŞAAT XİDMƏTİ”ə iki tender verib. Onlardan biri 30 oktyabrda reallaşıb və Respublikanın bir sıra təhsil müəssisələrinin təmiri və abadlıq işlərini əhatə edib. Bu müqavilənin dəyəri 8 milyon 777 min 208 manat təşkil edib.
İkinci tender isə 9 oktyabrda baş tutub. Tərəflər Respublikanın bir sıra təhsil müəssisələrində təmir, kommunal-kommunikasiya və abadlıq işlərinin görülməsi məsələsində 8 milyon 95 min 862 manata anlaşıblar.
Bu tendderlərdən biri isə ötən ilin 8 oktyabrına təsadüf edib. Həmin tender Respublika üzrə təhsil müəssisələrində təmir və kommunal-kommunikasiya işlərinin satınalınmasını əhatə edib. “S.H. İNŞAAT XİDMƏTİ” MMC bunun müqabilində Elm və Təhsil Nazirliyindən 3 milyon 492 min 100 manat ödəniş alıb.
Araşdırmalara əsasən məlum olub ki, “S.H. İNŞAAT XİDMƏTİ” (VÖEN: 1302481541) MMC 05.05.2011-ci il tarixdə Bakı şəhəri Lokal Gəlirlər Baş İdarəsində dövlət qeydiyyatına alınıb. Reyestr məlumatlarında nizamnamə kapitalı 50 manat olan MMC-nin hüquqi ünvanının, BAKI ŞƏHƏRİ, YASAMAL RAYONU, MƏTBUAT PR. , ev.24, MƏHƏLLƏ 540, m.11, qanuni təmsilçisi kimi isə Heydərov Səməd İsmayıl oğlu qeyd olunub.
Vergi öhdəlikləri üzrə 2011-2024-cü illərdə Vergi Məcəlləsinə uyğun olaraq vergi hesabatını və ya onu əvəz edən arayışı vaxtında təqdim etməməyə görə dəfələrlə maliyyə sanksiyası tətbiq edilib.
Qeyd edək ki, bu şirkət haqqında açıq mənbələrdə geniş məlumat yoxdur.
Qarşı tərəfi də dinləməyə hazırıq.
