1xeber.media xəbər verir ki, Finlandiya prezidenti Alexander Stubb Finlandiyanın MTV telekanalına müsahibəsində bildirib ki, Ukraynadakı münaqişəyə son qoyulması ilə bağlı razılaşma Avropada nəzərdə tutulduğu kimi “ədalətli sülh” üçün bütün şərtlərə cavab verməyəcək.
O, bildirib ki, Avropa ölkələri Ukraynanın müstəqilliyini, suverenliyini və ərazi bütövlüyünü qorumaq üçün çalışmaqda davam edir, lakin “real budur ki, sülh yaxşı və ya pis ola bilər, həm də kompromis ola bilər”.
“Reallıq ondan ibarətdir ki, biz finlilər də sülhün əldə olunduğu ana hazır olmalıyıq və son 4 ildə bu qədər danışdığımız ədalətli sülh üçün bütün şərtlərin yerinə yetirilməsi ehtimalı azdır”, - o deyib.
Stubb həmçinin etiraf edib ki, ABŞ-ın keçən ay açıqladığı ilkin 28 bəndlik plan avropalıları məyus edib.
Qeyd edək ki, daha əvvəl Rusiya prezidenti Vladimir Putin bəyan etmişdi ki, Avropa ölkələri Tramp administrasiyasının Ukraynadakı münaqişəni həll etmək səylərinə mane olur. Rusiya liderinin sözlərinə görə, Avropanın təklif etdiyi sülh planına edilən bütün dəyişikliklər yalnız prosesin qarşısını almaq məqsədi daşıyır.
