Son günlər siyasi gündəmi Prezident Administrasiyasının sabiq rəhbəri Ramiz Mehdiyev və Azərbaycan Xalq Cəbhəsi Partiyasının (AXCP) sədri Əli Kərimlinin adı ilə bağlı olan gizli əməkdaşlıq iddiaları zəbt edib. Hər iki şəxs barəsində seçilən qətimkan tədbirləri məsələnin ciddiliyini artırıb və həm siyasi, həm də hüquqi nəticələr barədə suallar doğurub. Xüsusilə diqqət çəkən məqam isə Əli Kərimlinin partiya rəhbəri kimi partiyanı etibarnaməsiz təmsil etməsi və bunun AXCP-nin hüquqi gələcəyinə hansı təsir göstərə biləcəyidir.
Partiyanın qeydiyyatı və fəaliyyəti risk altında qala bilərmi?
Globalinfo.az-a danışan Siyasi və Hüquqi Araşdırmalar Mərkəzinin sədri, hüquqşünas Xəyal Bəşirov deyib ki, son zamanlar Ramiz Mehdiyev-Əli Kərimli tandemi, yəni hakimiyyətdə yüksək vəzifələr tutmuş bir şəxslə uzun illər müxalifət lideri kimi tanınan digər şəxsin gizli əməkdaşlığına dair iddialar ictimai gündəmdədir:
“Biri ev dustaqlığına, digəri isə həbs-qətimkan tədbirinə məruz qalıb və bu, cəmiyyətdə ciddi rezonans yaradıb. Əgər istintaq və daha sonra məhkəmə tərəfindən hər iki şəxsin və digər iştirakçıların dövlət hakimiyyəti əleyhinə qanunsuz fəaliyyətləri təsdiqlənərsə, onlar qanun qarşısında cavab verəcəklər. Lakin proses bununla bitmir. Siyasi müstəvidə cavablandırılması vacib olan çoxsaylı suallar mövcuddur. Ramiz Mehdiyev uzun illər hakim partiyanın aparıcı simalarından biri, Prezident Administrasiyasının rəhbəri və yüksək dövlət rütbəsinə sahib şəxs olub. Digər tərəfdən, Əli Kərimli uzun müddət müxalifətin lideri kimi çıxış edib və AXCP-nin böyük bir hissəsinin etimadını qazanıb. O, proseslərdə sıravi şəxs kimi deyil, məhz partiya sədri qismində iştirak edib. Bu isə partiyanın digər funksionerlərinin də müəyyən formada məlumatlı olması ehtimalını gündəmə gətirir. Hazırda hər iki şəxs Cinayət Məcəlləsinin ən ağır maddələrindən biri – 278-ci maddə ilə ittiham olunur. Bu ittiham həm hakimiyyət, həm də müxalifət üçün öz cəbhəsinə xəyanət anlamı daşıya bilər”.
Hüquqşünas qeyd edib ki, Əli Kərimli öz partiyasını etibarnaməsiz təmsil etdiyi üçün onun fəaliyyəti AXCP-nin hüquqi gələcəyinə də birbaşa təsir edir:
“Qanuna əsasən, sədrlərin atdığı addımlar partiyanın məsuliyyəti kimi qiymətləndirilə bilər. Bu baxımdan AXCP-nin qeydiyyat məsələsi və gələcək fəaliyyətinin yenidən gündəmə gəlməsi mümkündür. Bundan başqa, qanuna əsasən partiyanın qeydiyyatda qalması üçün 5000 üzv şərti mövcuddur. Əli Kərimlinin həbsi fonunda partiya üzvləri arasında etimadın sarsılması, bunun sosial şəbəkələrdə görünən reaksiyalarda əks olunması üzvlük sayının azalması riskini artırır. Bu isə yenidən qeydiyyat prosesini aktuallaşdırır. Ümumilikdə, həm partiyanın hüquqi statusu, həm də sədrin partiyanı təmsil edərək iştirak etdiyi iddia olunan qanunsuz fəaliyyətlər qanunvericilik baxımından yenidən qiymətləndirilə bilər. Çünki Ramiz Mehdiyevin əməkdaşlıq etdiyi şəxs kimi sadəcə Əli Kərimlini deyil, AXCP sədri olan birini seçməsi partiyanın məsuliyyətini də gündəmə gətirir. Buna görə də yaxın dövrdə partiyanın qeydiyyatı məsələsinin şübhə altına düşməsi və müvafiq qurumların addım atması ehtimalı yüksəkdir”.
