Xəbər verdiyimiz kimi Bakı şəhəri, Səbail rayonu, İstiqlaliyyət küçəsi, ev 49, m. 6 ünvanında yerləşən, fiziki şəxs İsmayılov Vahid Cəmil oğluna məxsus "İvanovka" ticarət obyektində yoxlama keçirilib. Satışa çıxarılan kərə yağlarından Qida Təhlükəsizliyi Agentliyinin əməkdaşları tərəfindən nümunələr götürülərək laborator müayinələrə cəlb olunub. Sınaq nəticəsində kərə yağlarının tərkibinin bitki yağı və ya bitki yağları qarışığından ibarət olduğu müəyyən edilib.
Yoxlama zamanı süd məhsullarının (seperator üsulu ilə alınmış yağ, əridilmiş yağ, kəsmik, xama və s.) müvafiq baytarlıq sənədlərinin və etiket məlumatlarının olmadığı, yağların kərə yağı adı altında satışa çıxarıldığı aşkarlanıb.
Sahibkar süd məhsullarını mütəmadi olaraq İsmayıllı rayonunun İvanovka kəndində fəaliyyət göstərən müxtəlif fiziki şəxslərdən və İsmayıllı bazarından aldığını bildirib.
Məhsullar satışdan kənarlaşdırılıb, toxunulmazlıq aktı tərtib edilib və möhürlənərək saxlanca qoyulub. Təkrar laborator sınaq nəticəsində kərə yağı və kəsmik məhsulunun tərkibinin bitki yağı və ya bitki yağları qarışığından ibarət olduğu, həmçinin kəsmik məhsulunda mikrobioloji uyğunsuzluq (E.coli) müəyyən edilib.
Faktla bağlı ticarət obyektinin rəhbərliyi barəsində inzibati protokol tərtib edilib, süd məhsullarının satışı qadağan olunub.
Qeyd edək ki, “İvanovka” brendi ilə fəaliyyət göstərən başqa ticarət obyektləri də var.
Mövzu ilə bağlı fikirlərini Bizim.Media ilə bölüşən Azad İstehlakçılar İctimai Birliyinin sədri Eyyub Hüseynov deyib ki, Bakı şəhərində 20-ə qədər “İvanovka” şəbəkəsinə daxil olan marketlər var:
“Əslində isə İsmayıllı rayonunun İvanovka kəndi ilə bağlı Bakıda sovetdən qalma 2 dükan var. Çox təəssüf ki, AQTA məhz həmin dükanlardan birində ciddi nöqsanlar aşkar edib. Bu da o deməkdir ki, digər 20 dükanda vəziyyət daha acınacaqlıdır. Ona görə də hesab edirəm ki, “İvanovka” ticarət şəbəkəsi ciddi nəzarətə götürülməli və bu ad altında fəaliyyət göstərən və İvanovka kəndi ilə əlaqəsi olmayan marketlərin üzərindən bu ad götürülməlidir”.
Bəs, “İvanovka”nın digər ticarət obyektlərində də yoxlamalar aparılıbmı? Sözügedən kərə yağları dövriyyədən çıxarılır?
Bu suallarla AQTA-ya müraciət etdik. Qurumdan Bizim.Media-ya bildirilib ki, Agentliyin əməkdaşları tərəfindən Bakı şəhərində fəaliyyət göstərən digər “İvanovka” ticarət obyektlərində və İsmayıllı rayonunun İvanovka kəndində bu məhsulların istehsalı və satışını həyata keçirən qida subyektlərində nəzarət tədbirləri görülür:
“Kərə yağlarından və kəsmik məhsullarından götürülmüş nümunələr Qida Təhlükəsizliyi İnstitutunun müvafiq laboratoriyasına təqdim edilib. Araşdırmalar davam etdirilir. Nəticəsi barədə ictimaiyyətə məlumat veriləcək”.
