Rəsmi Tehranın “Azərbaycanla əlaqələr bizim üçün çox önəmlidir” açıqlamasından sonra bu ölkənin xarici işlər nazirii Abbas Əraqçinin Bakıya səfərindən bir həftə ötür.
Teleqraf-ın məlumatına görə, Azərbaycanın XİN rəhbəri Ceyhun Bayramovun iranlı həmkarı ilə görüşündə iki ölkə arasında əməkdaşlıq, aktual məsələlər, eyni zamanda da, regional və qlobal inkişaflar müzakirə edilib.
Bu rəsmi mətbuata açıqlanan hissəsidir.
Etibarlı mənbələr isə bildirir ki, Əraqçinin Bakı səfərində qarşılıqlı ittihamların olmaması kimi məsələlər də müzakirə olunub və bununla bağlı hər iki ölkənin xarici işlər naziri məsləhətləşmələr aparıb.
Amma Əraqçinin Bakı havası burnundan çəkilməmiş İran mediası Azərbaycana qarşı kütləvi hücuma başlayıb. Təsəvvür edirsiniz, Azərbaycan ikitərəfli münasibətlərdə yaranan problemlərin həlli üçün təşəbbüskar kimi çıxış edir, İran XİN rəhbəri Bakıya uçur, razılıq əldə olunur, geri qayıdanda isə hücum əmrinə start verilir.
Təbii ki, bu, Azərbaycan ictimaiyyəti üçün heç də sürpriz deyil. Tehranın verdiyi sözə əməl etməməsi onsuz da min dəfə olub, bu da olsun min birinci...
İstənilən halda bu, İranda iki hakimiyyətlilik olduğunu bir daha təsdiq edir, rəsmi instansiya amin, mollalar isə "müstəhəb deyil" deyir, hətta nə qədər gülməli olsa da, bunu məhruk adlandırır.
İranın sözünün üstündə durmayaraq Azərbaycanı hədəf seçməsinin isə bir sıra səbəbləri var.
Ölkəmizin İrandakı nüfuzundan narahat olan dairələr əhalinin fikrini susuzluq, yoxsulluq, enerji kimi böhranlardan yayındırmaq üçün bu metoda əl atıb. Görünür, İsraillə münaqişədə biabır olan, yüksək rütbəli zabitləri, nüvə alimləri yatdığı yerdə öldürülən İran hədəfi kənarda axtarmaqla gerçəkləri ört-basdır etməyə çalışır.
Təbii ki, İranın cəfəngiyyat dolu bu total hücumu rəsmi Bakının sadəcə, mənəvi olaraq narahat edə bilər. Çünki ortada verilmiş bir söz var idisə, buna həmən əməl olunmalı idi.
Amma biz İranın bu kimi, bundan betər davranışlarına artıq öyrəşmişik və qətiyyən təəccüblənmirik.
Xatırlayırsınızsa, Vaşinqtonda Azərbaycanla Ermənistan arasındakı tarixi razılaşma imzalanda, Zəngəzur dəhlizi ilə bağlı anlaşma əldə ediləndə ilk naqis çıxan İran olmuşdu.
Ali rəhbərin müşaviri Əli Əkbər Vilayətinin "Tehran Zəngəzur dəhlizinin açılmasına qarşı çıxacaq və buna ya Rusiya ilə birlikdə, ya da təkbaşına mane olacaq" deməsini siyasi komediya kimi qarşılamışdıq.
Aydın məsələdir ki, Azərbaycan müstəqilliyini elan etdiyi ilk gündən etibarən, İran tərəfindən riyakar münasibətlə qarşılaşır.
Qarabağ münaqişəsinin həllində heç bir iştirakı olmayan, əksinə Azərbaycana quyu qazan molla rejiminin təcavüzkar Ermənistanın ən böyük dəstəkçilərindən olduğu heç kimə sirr deyil.
Biz İranın TIR-larının Xankəndiyə yanacaq daşıdığını da, bayrağımız Xudafərinə sancılanda suveren ərazimizdə ordumuzun qarşısına İran hərbçilərinin çıxmasını da, sülh danışıqlarına mane olmasını da unutmuş deyilik.
İndi siz deyin: Onu bağışlamaq olarmı?..
