Ermənistan Xarici İşlər Nazirliyi Vaşinqtonda keçirilmiş sülh sammiti çərçivəsində əldə olunan razılaşmaların icrası üzrə Ermənistan–ABŞ Birgə İşçi Qrupunun ilk iclası barədə məlumat yayıb.
1xeber.media xəbər verir ki, nazirliyin mətbuat xidmətinin bildirdiyinə görə, iclas 17 dekabr tarixində baş tutub.
Görüşdə Ermənistan tərəfdən xarici işlər nazirinin müavini Vaahan Kostanyan, ABŞ tərəfdən isə Dövlət katibinin müavini köməkçisi Sonata Koulter onlayn formatda iştirak ediblər.
Vaahan Kostanyan ABŞ-ın Cənubi Qafqazda sülhün bərqərar olunmasına verdiyi əhəmiyyətli dəstəyi vurğulayıb və Ermənistan tərəfinin Ermənistan–ABŞ arasında imzalanmış anlaşma memorandumlarının icrasında fəal əməkdaşlığa maraqlı olduğunu bildirib.
Tərəflər əldə olunmuş konkret razılaşmaların praktiki icrası məqsədilə müzakirələrin ekspert səviyyəsində davam etdirilməsi barədə razılığa gəliblər.
ABŞ-ın Ermənistandakı səfirliyinin mətbuat xidmətinin məlumatına görə, iclas zamanı enerji təhlükəsizliyinin gücləndirilməsi, yarımkeçirici təchizat zəncirinin inkişafı, süni intellekt sahəsində əməkdaşlıq, həmçinin Ermənistanın yol infrastrukturu və sərhəd təhlükəsizliyinin möhkəmləndirilməsi üzrə imzalanmış memorandumların icrası məsələləri müzakirə olunub.
Bəyanatda qeyd olunur ki, “ABŞ Cənubi Qafqazda sülh və rifah barədə Prezident Donald Trampın baxışını həyata keçirmək üçün dəyərli strateji tərəfdaşı – Ermənistan Respublikası ilə əməkdaşlıqdan məmnundur”.
Xatırladaq ki, 8 avqust tarixində Vaşinqtonda Ermənistan, ABŞ və Azərbaycan liderləri münaqişənin sülh yolu ilə nizamlanmasına dair birgə bəyannamə imzalayıblar. ABŞ Prezidentinin açıqlamasına əsasən, Ermənistan “Tramp Marşrutu” (TRIPP) çərçivəsində ABŞ-a Azərbaycanla Naxçıvan arasında quru əlaqənin yaradılmasının nəzərdə tutulduğu yolun inkişafı üçün 99 ilədək müddətə eksklüziv uzunmüddətli hüquqlar təqdim edəcək. Sözügedən yol Ermənistan qanunvericiliyinə uyğun fəaliyyət göstərəcək.
Amerika tərəfi həmin ərazini infrastrukturun qurulması və idarə olunmasına cavabdeh olacaq konsorsiuma subicarəyə verməyi planlaşdırır. Eyni zamanda, hər iki ölkənin xarici işlər nazirləri sülh sazişini paraflayıblar.
