Son günlər Baş nazirin sabiq birinci müavini Abbas Abbasovun “Mehdiyev işi” çərçivəsində axtarışa verilməsi xəbəri ictimai müzakirələrə səbəb olub. Bu konteksdə onun bir vaxtlar deputat olmuş oğlu Aydın Abbasov da diqqət mərkəzindədir. Bildirilir ki, sabiq millət vəkilinin də fəaliyyəti araşdırılmalı, hətta istintaqa cəlb olunmalıdır.
Bu, mümkündürmü? Aydın Abbasov xaricdə olduğu təqdirdə, Azərbaycana təhvil verilə bilərmi?
Globalinfo.az-a danışan hüquqşünas Əkrəm Həsənov deyib ki, Aydın Abbasova qarşı ittiham varsa, o, istintaqa cəlb oluna bilər:
“Bildiyim qədər Aydın Abbasov barəsində cinayət işi başladılmayıb. Əgər axtarışa verilərsə, o zaman onu olduğu ölkədən istəmək mümkündür. Abbas Abbasovun isə Rusiyada olduğu barədə məlumatlar var. Məsələ hüquqi əsaslardan asılıdır. Əgər Azərbaycanda hər hansı bir şəxs barəsində cinayət işi başlanıbsa və bunun üçün tutarlı hüquqi əsaslar mövcuddursa, iki mexanizm tətbiq edilə bilər. Ya həmin şəxs İnterpol xətti ilə beynəlxalq axtarışa verilir, ya da onun olduğu ölkəyə birbaşa müraciət olunur. Şəxsin harada olduğu məlumdursa, müvafiq ölkəyə rəsmi sorğu göndərilə bilər”.
Hüquqşünas bildirib ki, növbəti mərhələdə məsələ həmin ölkənin məhkəmə orqanları tərəfindən araşdırılır:“Məhkəmədə tutarlı əsaslar təqdim edilərsə, şəxsin Azərbaycana ekstradisiyası barədə qərarın olması mümkündür. Lakin burada yalnız hüquqi amillər deyil, dövlətlərarası münasibətlər də mühüm rol oynayır. Belə proses qarşılıqlılıq prinsipi əsasında həyata keçirilir”.
Əkrəm Həsənovun sözlərinə görə, Azərbaycan və Türkiyə arasında bu sahədə əməkdaşlıq təcrübəsi mövcuddur:
Azərbaycan və Türkiyə zaman-zaman bir-birinə axtarışda olan şəxsləri təhvil veriblər. Lakin Rusiya ilə münasibətlərdə bu proses hər zaman eyni cür baş vermir. Ona görə də konkret halda ekstradisiyanın mümkün olub-olmayacağını dəqiq demək çətindir”.
Xatırladaq ki, Dövlət Təhlükəsizliyi Xidmətində Ramiz Mehdiyev və digərləri barəsində “dövlət hakimiyyətini ələ keçirməyə yönələn hərəkətlər” ittihamı ilə istintaqı aparılan cinayət işi üzrə növbəti qərar bəlli olub.
Cinayət işi üzrə toplanmış materiallar əsasında, Baş nazirinin sabiq birinci müavini, uzun illər Ramiz Mehdiyevin müdafiəsi nəticəsində məsuliyyətdən kənarda qalmış Abbas Abbasovun qeyd olunan cinayət işi üzrə istintaqa cəlb edilməsi barədə qərar qəbul edilib, ölkə hüdudlarından kənarda olmaqla istintaqdan yayındığı üçün barəsində axtarış elan edilib.
Qeyd edək ki, A.Abbasov 1992-ci ildən Azərbaycan Respublikası Baş nazirinin birinci müavini vəzifəsində çalışmışdır. Bu müddət ərzində bir neçə dövlət komissiyasının sədri olmuşdur. 2006-cı ildə tutduğu vəzifədən azad edildikdən sonra Rusiya Federasiyasında yaşamağa başlayıb.
