Qlobal siyasi sistemdə dərin dəyişikliklərin baş verdiyi, regional və beynəlxalq təhlükəsizlik mühitinin mürəkkəbləşdiyi bir dövrdə Azərbaycan Respublikasının Prezidenti İlham Əliyevin 05 yanvar 2026-cı il tarixində yerli televiziya kanallarına verdiyi müsahibə ölkənin daxili və xarici siyasət prioritetlərinin aydın ifadəsi kimi diqqət çəkir.
Prezident İlham Əliyevin müsahibələri artıq illərdir ki, təkcə cari məsələlərə münasibət bildirmək deyil, eyni zamanda Azərbaycanın dövlət idarəçiliyi fəlsəfəsini, milli maraqlara əsaslanan inkişaf modelini və strateji baxışını cəmiyyətə çatdıran mühüm platforma rolunu oynayır. Son müsahibə də bu baxımdan ardıcıl və məqsədyönlü dövlət siyasətinin məntiqi davamı kimi qiymətləndirilir.
Dövlət başçısı müsahibədə Azərbaycanın son illərdə əldə etdiyi siyasi, iqtisadi və sosial
nailiyyətlərinin əsasının düşünülmüş və milli maraqlara söykənən siyasət olduğunu vurğulayıb. Qeyd olunub ki, ölkənin inkişaf modeli suverenlik, müstəqillik və daxili sabitlik prinsiplərinə əsaslanmaqla yanaşı, müasir çağırışlara çevik cavab verə bilən idarəetmə mexanizmləri üzərində qurulub.
Sosial-iqtisadi inkişaf məsələlərinə toxunan Prezident İlham Əliyev əhalinin rifah halının yüksəldilməsi, sosial müdafiə sisteminin gücləndirilməsi və iqtisadiyyatın şaxələndirilməsinin dövlət siyasətinin əsas prioritetləri olduğunu bildirib. Vurğulanıb ki, həyata keçirilən islahatların mərkəzində Azərbaycan vətəndaşı dayanır və bütün qərarlar insan kapitalının inkişafına xidmət edir.
Müsahibədə iqtisadi təhlükəsizliyin milli təhlükəsizliyin ayrılmaz tərkib hissəsi olduğu xüsusi qeyd edilib. Makroiqtisadi sabitliyin qorunması, qeyri-neft sektorunun inkişafı, rəqabətqabiliyyətli iqtisadi mühitin formalaşdırılması və regionların tarazlı inkişafı istiqamətində tədbirlərin ardıcıl şəkildə davam etdirildiyi diqqətə çatdırılıb.
Prezident İlham Əliyev müsahibə zamanı dövlət idarəçiliyinin səmərəliliyinin artırılmasında kadr siyasətinin xüsusi rolunu da önə çəkib. Dövlət başçısı qeyd edib ki, son illər həyata keçirilən kadr islahatları peşəkarlıq, məsuliyyət, şəffaflıq və milli maraqlara sədaqət prinsiplərinə əsaslanır. Vurğulanıb ki, idarəetmədə gənc, müasir düşüncəli, bilikli və təşəbbüskar kadrların irəli çəkilməsi dövlət siyasətinin davamlılığının və çevikliyinin təmin olunmasına xidmət edir.
Eyni zamanda bildirilib ki, kadr seçimində peşəkar potensialın düzgün qiymətləndirilməsi və institusional davamlılığın təmin olunması əsas meyarlar sırasında yer alır. Prezident İlham Əliyevin həyata keçirdiyi kadr siyasəti dövlət idarəçiliyində məsuliyyətin artırılmasına, qərarların icra mexanizmlərinin gücləndirilməsinə və vətəndaş məmnunluğunun yüksəldilməsinə yönəlib.
Ölkə Prezidenti Azərbaycanın xarici siyasət kursuna da toxunaraq bildirib ki, ölkəmiz müstəqil, praqmatik və balanslaşdırılmış xarici siyasət yürüdür və bu siyasətin mərkəzində milli maraqlar dayanır. Regional əməkdaşlıq təşəbbüsləri və beynəlxalq layihələ Azərbaycanın geosiyasi mövqeyinin möhkəmlənməsinə xidmət edir. Dövlət başçısı, eyni zamanda, beynəlxalq hüquqa əsaslanan mövqenin dəyişməz olduğunu, Azərbaycanın suverenliyinə və ərazi bütövlüyünə yönələn istənilən təhdidə qətiyyətlə cavab veriləcəyini vurğulayıb.
Ümumilikdə, Prezident İlham Əliyevin yerli televiziya kanallarına verdiyi bu müsahibə Azərbaycanın mövcud mərhələdə qarşısında duran əsas vəzifələri, strateji hədəfləri və gələcək inkişaf yolunu aydın şəkildə ortaya qoyur. Müsahibə bir daha göstərir ki, Azərbaycan güclü siyasi iradəyə, peşəkar kadr potensialına və milli maraqlara söykənən davamlı inkişaf strategiyasına malik dövlətdir.
Anar Xəlilov,
Sabirabad RİHB aparatının Ərazi-təşkilat məsələləri sektorunun baş məsləhətçisi
