“Qarabağ” klubunun prezidenti Tahir Gözəl UEFA Çempionlar Liqasının pley-off mərhələsi ərəfəsində nümayiş etdirdiyi konstruktiv mövqeyə görə “Neftçi” rəhbərliyinə minnətdarlığını bildirib.
1xeber.media xəbər verir ki, klub rəhbəri İngiltərənin “Nyukasl” komandası ilə keçiriləcək vacib oyunlar arasındakı sıx qrafiki nəzərə alaraq Misli Premyer Liqasının XXI turundakı “derbi”nin təxirə salınmasına razılıq verən rəqib kluba təşəkkür edib:
“Oyunun təxirə salınması ilə bağlı göstərilən anlayış və konstruktiv mövqeyə görə “Neftçi” rəhbərliyinə və İdarə Heyətinə səmimi təşəkkürümü bildirirəm. “Neftçi” klubu bu qərarı ilə bir daha öz futbol ənənəsinə, əsalətinə və Azərbaycan futbolunun ümumi maraqlarına sadiqliyini nümayiş etdirdi. Bu addım sübut etdi ki, rəqabət nə qədər prinsipial olsa da, milli ruh, qarşılıqlı hörmət və birlik hər zaman prioritet olaraq qalır.
İnanıram ki, bu cür yanaşmalar ölkə futbolunun inkişafına və klublar arasında sağlam münasibətlərin daha da möhkəmlənməsinə xidmət edir. Eyni zamanda, müraciətimizə əsasnaməyə uyğun, operativ və obyektiv şəkildə yanaşdığına görə Peşəkar Futbol Liqasına minnətdarlığımı bildirirəm. “Neftçi”yə gələcək fəaliyyətində uğurlar arzulayıram”.
Qeyd edək ki, Misli Premyer Liqasının 21-ci turunda üz-üzə gələcək “Neftçi” və “Qarabağ”ın fevralın 21-nə nəzərdə tutulan oyunu təxirə salınıb.
