Məhkəmə-hüquq sistemində tam elektron icraata mərhələli keçid və onlayn məhkəmə mexanizmlərinin genişləndirilməsi ədalət mühakiməsinin daha əlçatan, operativ və şəffaf həyata keçirilməsinə imkan yaradacaq.
1xeber.media xəbər verir ki, bu fikri Ali Məhkəmənin Mülki Kollegiyasının sədri, Məhkəmə-Hüquq Şurasının üzvü Sənan Hacıyev Azərbaycan Hakimlərinin II Forumu çərçivəsində "Rəqəmsallaşma və süni intellektin tətbiqi imkanları" adlı panel müzakirəsi zamanı səsləndirib.
Onun sözlərinə görə, əsas məqsəd kağız daşıyıcılardan imtina edərək məhkəmə icraatlarının tam elektron mühitə keçirilməsidir. Bu proses çərçivəsində onlayn icraatların genişləndirilməsi, sənədlərin elektron qaydada təqdim edilməsi və məhkəmə proseslərində məsafədən iştirak imkanları artırılacaq.
Sənan Hacıyev vurğulayıb ki, tam elektron icraata keçid regionlarda yaşayan vətəndaşların məhkəmələrə fiziki müraciət ehtiyacını azaldacaq, eyni zamanda, hakimlər arasında iş yükünün daha balanslı bölüşdürülməsinə şərait yaradacaq.
Qeyd olunub ki, məhkəmə qərarlarının və icraat materiallarının vahid elektron data bazasında toplanması süni intellekt texnologiyalarının tətbiqini mümkün edəcək. Bu isə vahid məhkəmə təcrübəsinin formalaşdırılması, qərarların təhlili və gələcəkdə məhkəmə qərarlarının proqnozlaşdırılması baxımından mühüm əhəmiyyət daşıyır.
Həmçinin vurğulanıb ki, elektron məhkəmə icraatı ədalət mühakiməsinin sürətini artırmaqla yanaşı, məhkəmə sisteminin müasir çağırışlara uyğunlaşmasına xidmət edəcək.
