“Mən özüm dəfələrlə prezidentin xarici səfərləri zamanı təhlükəsizliyi təmin edən şəxslərdən bir olmuşam. Deyə bilərəm ki, istənilən biri ölkədə dövlət başçısı ilə yanaşı, onu müşaiyət edən bütün nümayəndə heyətinin, o cümlədən mühafizəçilərin də təhlükəsizliyi təmin olunmalıdır”.
1xeber.media xəbər verir ki,bunu “Yeni Sabah”a açıqlamasında Prezident yanında Xüsusi İdarənin keçmiş rəisi, ehtiyatda olan polkovnik Cavanşir Vəliyev deyib.
Onun sözlərinə görə, prezidentlərin səfəri zamanı həmin ölkə təhlükəsizliyə cavabdeh olan bir nəfər səlahiyyətli şəxs təyin edir:
“Videoya diqqətlə baxsanız görərsiniz ki, Prezidentin Təhlükəsizlik Xidmətinin rəisi, general-mayor Fərid Əsgərovun yanında bir nəfər amerikalı var. Həmin şəxs təhlükəsizlik tədbirlərini koordinasiya edir”.
Cavanşir Vəliyev bildirib ki, baş verənləri heç bir halda aksiya kimi qəbul etmək olmaz, bu, birbaşa təxribatdır:
“Görüntülərə baxanda təxmin etmək olur ki, təxribat törədən şəxslər girişi qadağan olunmuş sahəyə daxil olublar. Qanunvericiliyə görə, şəxs istədiyi yerdə istədiyi şüarları səsləndirə bilməz. Mühafizəçilər təxribatçılardan ərazidən uzaqlaşmalarını tələb edir. Həmin şəxslər söyüş söyüb mühafizəçilər isə onları vurub. ABŞ polisinin hadisəyə niyə müdaxilə etmədiyi müəmmalıdır, bunun səbəbini demək çətindir. Biz prosesi sadəcə video-görüntülərdən izləmişik. Ola bilsin ki, ABŞ polisinin müdaxiləsi olub. Qanunvericilik çərçivəsində, həmin təxribatçılar mühakimə edilməlidir. Hiss olunur ki, onlar aksiya barədə əvvəldən heç kimə məlumat verməyiblər və əraziyə qanunsuz yığılıblar”.
Polkovnik vurğulayıb ki, həmin şəxslərin ABŞ-dən deportasiya edilməsi istisna deyil:
“Mən əvvəllər Diasporla İş üzrə Dövlət Komitəsində işləmişəm. Bizim soydaşlarımız xaricdə müəyyən bir tədbir keçirmək üçün 15 gün əvvəl müraciət edirdilər. Meqafonu götürüb istənilən yerdə üstəlik təhqiramiz ifadələr işlətmək birmənalı olaraq qanunların pozulmasıdır. Həmin şəxslər bu əmələ görə cəzalandırıla yaxud deportasiya oluna bilərlər. Mən sizə adi bir şey deyim. ABŞ-də yaşayan 1 azərbaycanlı öz avtomobili ilə Kanadaya getmişdi və orada yol qaydasını pozduğu üçün onu deport etmişdilər. ABŞ-nin bu sahədə qanunları çox sərtdir. Bu təxribatda iştirak etmiş şəxslərlə bağlı yoxlamalar aparılacaq. Onların ABŞ vətəndaşlığı yoxdursa, deportasiya ediləcəklər”.
Xatırladaq ki, fevralın 19-da xaricdə yaşayan bir neçə anti-azərbaycanlı ünsür aqressiv və təhrikedici formada Prezident İlham Əliyevin ABŞ paytaxtı Vaşinqtonda qaldığı hotelə daxil olmaq istəyib. Onlar kifayət qədər qeyri-etik davranışları ilə diqqəti cəlb edərək və öz mənəviyyatlarına uyğun ifadələr işlədərək təhlükəsizlik kordonunu yarmağa və zorla hotelə daxil olmağa cəhd göstəriblər.
Azərbaycan Prezidentinin təhlükəsizlik xidmətinin əməkdaşları ABŞ polisi ilə birlikdə operativ şəkildə müdaxilə edərək həmin şəxsləri peşəkarlıqla zərərsizləşdiriblər və təxribat cəhdinin qarşısını alıblar.
