Bizon Azərbaycan Kubokunun 1/4 final mərhələsində keçirilən “Qarabağ” - “Şamaxı” oyunundan (3:1) sonra komandamızın baş məşqçisi Qurban Qurbanovun mətbuat konfransı keçirilib.
1xeber.media xəbər verir ki, təcrübəli mütəxəssis qarşılaşma barədə fikirlərini bölüşüb:
“Futbolçularımı təbrik edirəm. Vacib nəticə əldə etdik. İkinci hissədə oyunu, demək olar ki, tam ələ almışdıq. Qalibiyyət çox önəmli idi. Futbolçular düzgün oynamağa çalışdılar. Yorğunluq hiss olunurdu. Qarşıdakı günlərdə özlərinə gələcək və optimal formada olacaqlar. Azarkeşlərimizə təşəkkür edirəm. Şamaxıdan gələn azarkeşlər də öz komandalarını dəstəklədilər”.
Baş məşqçi mövsümün sonlarında oyun sayının çoxluğuna hazır olduqlarını söyləyib:
“Sıx qrafikdə oynasaq da, öhdəsindən gələcəyik. İstənilən matça futbolçuları kökləmək bizim işimizdir. İlboyu sıx qrafikdə çıxış etmək asan deyil. Bir görüşdən digərinə keçid zamanı vaxt olmur. Oyundan-oyuna tələblər olur, gərginlik artır. Futbolda bu kimi hallar normaldır”.
Qeyd edək ki, Ağdam təmsilçisi iki oyunun cəmində 4:3 hesablı qələbə qazanaraq, yarımfinala vəsiqə əldə edib.
