Gürcüstanda moda, mədəniyyət və qadın özünüifadəsini vahid məkanda birləşdirən “Ayala fest” (Ayala sözü türk mənşəli bir söz olub, həm qazax, həm də digər türk dillərində dərin və zərif mənaları daşıyır) beynəlxalq qadın festivalı keçirilib.
1xeber.media xəbər verir ki, Novruz bayramı çərçivəsində baş tutan festival “Novruz — qadın baharı” mövzusuna həsr olunub.
Festivalın əsas qayəsi qadın identikliyini ənənələr, müasir estetika və beynəlxalq əməkdaşlıq prizmasından nümayiş etdirməkdir. Layihənin təsisçisi və beynəlxalq prodüser Diana Mukajanova qeyd edir ki, festivalın missiyası qadınların stereotiplərdən uzaq, azad və autentik şəkildə öz potensiallarını üzə çıxara biləcəyi ekosistem yaratmaqdır.
“Ayala fest” artıq Qazaxıstanın Astana, Karaqanda, Kostanay və Petropavlovsk kimi şəhərlərində uğurlu iz qoyub. 2026-cı ildə Gürcüstanın seçilməsi layihənin beynəlxalq miqyasda genişlənməsinin növbəti addımıdır. Gələcəkdə festivalın coğrafiyasının Türkiyə və digər tərəfdaş ölkələri də əhatə etməsi planlaşdırılır.
Festivala dəvət almış “Alyans” Gənclər Mərkəzinin sədri Leyla Əmrəhova bildirib ki, Ayala — sərhədsiz mədəniyyət və şablonlarsız estetika deməkdir: “Festival qadına bir dəyər, şəxsiyyət və yaradıcı qüvvə mənbəyi kimi baxır. "Novruz — qadın baharı" konsepsiyası isə təbiətin oyanışı ilə qadın enerjisinin harmoniyasını simvolizə edir. Novruz bayramı sadəcə təqvimin dəyişməsi deyil, həm də xalqların ortaq tarixi yaddaşını, fəlsəfəsini və mədəniyyətini daha dərindən öyrənmək üçün misilsiz xəzinədir. Bu bayramın köklərinə enmək, əslində bəşəriyyətin ən qədim sivilizasiya qatlarına səyahət etmək deməkdir”.
Festivalda “Alyans” Gənclər Mərkəzinin şagirdlərinin əl işləri, şamlar və Azərbaycanın milli təamları - Novruz sovqatları nümayış olunub.
