Xiaomi korporasiyası istifadəçiləri Redmi seriyalı smartfonların qiymətlərinin artacağı barədə xəbərdar edib

1xeber.media xəbər verir ki,bu barədə şirkət rəhbəri Lu Veybinq Weibo bloqunda bildirib.

Xiaomi-nin top-meneceri qeyd edib ki, komponentlərin qiymətində artım dayanmaq bilmir və bu, şirkəti mövcud smartfonların qiymətlərini bir qədər qaldırmağa məcbur edir. Veybinq Redmi K90 Pro Max, Turbo 5 və Turbo 5 Max modellərinə tətbiq olunan daimi endirimlərin faktiki olaraq ləğv edildiyini açıqlayıb.

Lu Veybinq etiraf edib ki, 12 giqabayt əməli yaddaş və 512 giqabayt daxili yaddaşa malik münasib qiymətli Redmi K90 Pro Max telefonunun başlanğıc qiyməti artıq 1500 yuana çatıb, 16 giqabayt əməli yaddaş və 1 terabayt daxili yaddaşa malik versiya isə “daha da ciddi şəkildə bahalaşıb”.

Ehtimal olunur ki, yerli bazardakı bu qiymət artımı Redmi smartfonlarının bütün dünyada satış qiymətinə də təsir göstərəcək.

Xiaomi rəhbəri bildirib ki, şirkət daha çox komponent almaq və qiymətləri bir daha artırmamaq üçün əlindən gələni edir. “Lakin bu böhranın miqyası və həcmi gözləntiləri xeyli üstələyib”, - deyə Çin texnologiya nəhənginin rəhbəri vurğulayıb.

Onun sözlərinə görə, şirkət smartfonların qiymətini artırmasa, müntəzəm tədarükü təmin edə bilməyəcək və cihazlar qıtlaşacaq.