Məlum olduğu kimi, Azərbaycan Qolf Federasiyasına yenidən iş adamı Rauf Xəlilov prezident seçilib.
"ISR Holding"in təsisçisi İsgəndər Xəlilovun oğlu, həmin holdinqin baş icraçı direktoru, Britaniyanın "Costa Coffee" şəbəkəsini Azərbaycana gətirən, eyni zamanda "Sabah" Futbol Klubunun Müşahidə Şurasının üzvü olan Rauf Xəlilov yenidən 4 il müddətinə prezident vəzifəsini davam etdirəcək.
Zakir İbrahimov və Anar Əzimov federasiyanın vitse-prezidentləri, Kamran Qasımov, Zaur İbrahimov və Kamal İbrahimov isə İdarə Heyətinin üzvləri seçiliblər.
Bunlardan Anar Əzimov əvvəl də vitse-prezident işləyib. Kamran Qasımov isə əvvəl də İdarə Heyətinin üzvü olub.
Bəs digər şəxslər kimlərdir? 1xeber.media xəbər verir ki,Prosport.az bunu araşdırıb.
Yeni vitse-prezident Zakir İbrahimov 26 may 2016-cı ildən "AzerGold" Qapalı Səhmdar Cəmiyyətinin (QSC) sədridir. O daha əvvəl federasiyada İdarə Heyətinin üzvü olub.
İdarə Heyətinin yeni üzvü Zaur İbrahimov isə Zakir İbrahimovun oğludur. O, "Alltegrity Group"da baş icraçı direktor Rüfət Cabarovun müavinidir.
İdarə Heyətinin digər yeni üzvü də İbrahimov soyadındadır. Onlar arasında nə qədər qohumluq əlaqəsi olduğunu bilmirik. Ancaq Kamal İbrahimov 2021-ci ildən "Baku Steel Company" QSC-nin Baş direktoru, 2016-cı ildən "Qala Həyat Sığorta" ASC və "Qala Sığorta" ASC-nin Direktorlar Şurasının sədri, iqtisad elmləri namizədidir.
Qeyd edək ki, daha əvvəlki – 2022-ci ilin fevralın 10-da keçirilmiş seçkidə seçilmiş Tural Vəlizadə (baş məşqçi), Nigar Süleymanova (əvvəlki prezident Anar Məmmədovun vaxtında baş katib olub) və İlqar Rüstəmov daha federasiyanın İdarə Heyətində yer almır. Onları məhz Zaur İbrahimov və Kamal İbrahimov əvəzləyib. Federasiyanın baş katibi isə Arif Novruzovdur. O bu postda ötən ilin mayınadək işləmiş Leyla Abbasovanı əvəzləyib. L.Abbasova isə “Sea Breeze Resort”da işləməyə başlayıb və fevralda Baş Biznes İnkişafı Direktoru vəzifəsinə yüksəlib.
Qeyd edək ki,Azərbaycan Qolf Federasiyasına uzun müddət keçmiş nəqliyyat naziri Ziya Məmmədovun oğlu Anar Məmmədov rəhbərlik edib.
Lakin sabiq nazirin vəzifədən uzaqlaşdırılmasından sonra federasiyanın fəaliyyətində uzunmüddətli durğunluq yaranmış, qurumun maliyyə imkanları məhdudlaşmış və Bakıdakı Qolf Akademiyası fəaliyyətini dayandırmışdı.
Faktiki olaraq rəhbərsiz qalan və beynəlxalq layihələrdən kənarda qalan federasiyada idarəçilik boşluğunu aradan qaldırmaq məqsədilə 2021-ci ildə rəhbərlik dəyişdirilərək Rauf Xəlilova həvalə edilmişdi.
Rauf Xəlilov isə 2026-cı ilin aprel ayında keçirilən növbəti ümumi yığıncaqda yenidən federasiya prezidenti seçilərək növbəti 4 il müddətinə öz postunda qalıb.
