Aprelin 17-də Lənkəran Rayon Ağsaqqqallar Şurasının sədri Eldar Hüseynovun 85 illik yubileyi ilə bağlı “Deniz Hotel”də tədbir keçirilib. Tədbirdə Lənkəran Şəhər İcra Hakimiyyətinin (ŞİH) başçısı Taleh Qaraşov, Azərbaycan Ağsaqqallar Şurasının İdarə Heyətinin üzvü İbrahim Quliyev, hüquq-mühafizə orqanlarının rəhbərləri, ziyalılar və rayon ictimaiyyətinin nümayəndələri iştirak ediblər.
1xeber.media xəbər verir ki,Lənkəran ŞİH başçısı Taleh Qaraşov yubilyarı təbrik edib, ona möhkəm can sağlığı, uzun ömür, ruh yüksəkliyi və həyatının bundan sonrakı mərhələsində də xoş, firavan günlər arzulayıb. İcra başçısı bildirib ki, zəngin ömür yolu keçən, dərin hörmət və ehtiram qazanan Eldar müəllimin 85 illik ömrü tarixlə yazılmış bir həyat kitabıdır ki, bu kitabın hər səhifəsində zəhmət, fədakarlıq, səbr, mübarizə və uğurlar öz əksini tapıb.
Taleh Qaraşov qeyd edib ki, ağsaqqal olmaq təkcə yaş göstəricisi deyil, bu həm də, həyat təcrübəsinin, müdrikliyin, ədalətin və mənəvi dəyərlərin daşıyıcısı olmaqdır. Bu ali keyfiyyətləri özündə birləşdirən Eldar müəllim illərdir ki, cəmiyyətimizə nümunə olan fəaliyyəti ilə seçilir. Onun rəhbərliyi ilə Ağsaqqallar Şurası yalnız bir məsləhətçi qurum deyil, həm də birlik, həmrəylik və milli-mənəvi dəyərlərimizin qorunub saxlanmasının əsas dayaqlarından birinə çevrilib.
İcra başçısı Ağsaqqallar Şurasının sədri kimi fəaliyyət göstərməyin böyük məsuliyyət, eyni zamanda yüksək etimadın göstəricisi olduğunu vurğulayıb: ”Bu vəzifə yalnız idarəçilik deyil, həm də cəmiyyətin mənəvi dayağı olmaq, insanlar arasında körpü rolunu oynamaq deməkdir. Ağsaqqallar Şurasının əsas məqsədi milli-mənəvi dəyərlərimizi qorumaq, nəsillər arasında əlaqəni möhkəmləndirmək və cəmiyyətdə sağlam mühitin formalaşmasına töhfə verməkdir. Eldar müəllim fəaliyyəti dövründə hər zaman bu prinsiplərə sadiq qalıb”.
Daha sonra Azərbaycan Ağsaqqallar Şurasının İdarə Heyətinin üzvü İbrahim Quliyev, Lənkəran Rayon Ağsaqqqallar Şurası İdarə Heyətinin üzvləri və digər qonaqlar çıxış ediblər. Natiqlər uzun illər müxtəlif vəzifələrdə, xüsusilə bələdiyyə sistemində fəalliyyət göstərən yubilyarın hər zaman gənc nəslin düzgün istiqamətləndirilməsinə, onların vətənpərvər ruhda yetişməsinə xüsusi önəm verdiyini, onun təkcə bir rəhbər deyil, həm də bir yol göstərən, ağsaqqal, gənclərin isə arxalandığı bir şəxsiyyət olduğunu qeyd ediblər.
Lənkəran Rayon Ağsaqqqallar Şurasının sədri Eldar Hüseynov da öz növbəsində ona göstərilən diqqət və qayğıya görə dərin minnətdarlığını bildirib və bundan sonra da bütün bilik və təcrübəsini Ulu Öndər Heydər Əliyevin yüksək ideyalarının, dövlət başçısı cənab İlham Əliyevin uğurlu siyasətinin təbliğinə və gənc nəslin mənəvi tərbiyəsinə həsr edəcəyini vurğulayıb.
Sonda yubilyara Lənkəran ŞİH-nin və Azərbaycan Ağsaqqallar Şurasının Fəxri Fərmanı təqdim edilib.
