İran Prezidenti Məsud Pezeşkian sərt ritorikadan müəyyən uzaqlaşmanın siqnalını verir və müharibənin mümkün qədər tez dayandırılmasına çağırır.
1xeber.media xəbər verir ki,CNN-in yazdığına görə, o, açıq şəkildə bildirir ki, münaqişənin davamı heç kimə fayda vermir - nə İranın özünə, nə qarşı tərəfə, nə də bütövlükdə regiona.
Pezeşkian gərginliyin azaldılması üçün "bütün məntiqli və diplomatik yolların" işə salınmasının vacibliyini vurğulayır. Bu mesaj təkcə atəşkəs çağırışı deyil, həm də Tehranda müharibənin siyasi, iqtisadi və ictimai nəticələri ilə bağlı narahatlığın artdığını göstərən siqnaldır.
İran prezidenti xüsusilə müharibədən sonrakı ağır yükə diqqət çəkir: infrastrukturun bərpası, bazar sabitliyinin qorunması və maliyyə resurslarının təmin edilməsi. Onun xəbərdarlığına görə, proseslərdə şəffaflıq olmazsa, bu, cəmiyyətin hakimiyyətə inamını daha da sarsıda bilər.
Bununla belə, CNN qeyd edir ki, Pezeşkian danışıqlar prosesində əsas fiqur sayılmır və münaqişənin dayandırılması ilə bağlı həlledici təsir imkanlarına malik deyil. Yəni onun bəyanatları daha çox İran daxilində mövqelərin dəyişdiyini göstərən siyasi mesaj kimi oxunur, nəinki yekun qərarı müəyyən edən faktor kimi.
Bu baxımdan, Pezeşkianın çıxışı bir detal yox, daha böyük mənzərənin hissəsidir: Tehran anlayır ki, uzanan savaş təkcə cəbhədə deyil, ölkənin daxilində də ağır hesab yaradır.
