Medianın İnkişafı Agentliyinin təşkilatçılığı ilə keçirilən “İctimai proseslər media müstəvisində” mövzusunda III Forum çərçivəsində “Rəqəmsal mühitdə gözlənilməz risklər: Zərərli informasiyaya qarşı birgə mübarizə” adlı panel sessiya keçirilib.
1xeber.media xəbər verir ki,Medianın İnkişafı Agentliyinin Naxçıvan regional idarəsinin müdiri Vəfa İsgəndərovanın moderatorluğu ilə keçirilən paneldə Azərbaycan Respublikasının Elm və Təhsil Nazirliyinin, Azərbaycan Respublikasının Ailə, Qadın və Uşaq Problemləri üzrə Dövlət Komitəsinin, həmçinin Azərbaycan Respublikasının Rəqəmsal İnkişaf və Nəqliyyat Nazirliyi yanında Elektron Təhlükəsizlik Xidmətinin səlahiyyətli nümayəndələri spiker qismində çıxış ediblər.
Panel sessiya zamanı rəqəmsal mühitdə artan informasiya riskləri, zərərli və manipulyativ məzmunun yayılma dinamikası, kibertəhlükəsizlik çağırışları və bu sahədə institusional əməkdaşlığın gücləndirilməsi məsələləri geniş müzakirə olunub. Bildirilib ki, dezinformasiyanın qarşısının alınması, istifadəçilərin rəqəmsal savadlılığının artırılması və təhlükəsiz informasiya mühitinin formalaşdırılması üçün dövlət qurumları ilə media arasında koordinasiyalı fəaliyyət xüsusi əhəmiyyət kəsb edir.
Sessiyada həmçinin qeyd olunub ki, müasir informasiya mühitində media yalnız məlumat ötürən vasitə deyil, eyni zamanda zərərli informasiya axınlarına qarşı maarifləndirici və qoruyucu mexanizm kimi çıxış edir, bu baxımdan media subyektlərinin məsuliyyəti, peşəkarlığı və etik yanaşmaları informasiya təhlükəsizliyinin təmin olunmasında mühüm rol oynayır.
