Gürcüstan hakimiyyəti rəsmi olaraq Qərb ölkələrinin Rusiyaya qarşı "ikinci cəbhə" açmaq üçün onlara təzyiq göstərdiyini etiraf etdi.
1xeber.media xəbər verir ki, Rusiya Xarici İşlər Nazirliyinin MDB Ölkələri üzrə Dördüncü Departamentinin direktoru Mixail Kalugin bunu 12 mayda bildirib.
"Qərblilər üçün Cənubi Qafqaz regionu coğrafi cəhətdən uzaq və mədəni cəhətdən yaddır. Onların oradakı niyyətləri konstruktiv deyil, dağıdıcıdır, geosiyasi oyunlarla bağlıdır və artıq yalnız Rusiyaya qarşı deyil. Bu baxımdan, Tiflisin 2022-ci ildən bəri Moskvaya qarşı "ikinci cəbhə" açmaq üçün sözün əsl mənasında təzyiq göstərildiyini açıq şəkildə etiraf etməsi özünü göstərir", - deyə o, TASS-a verdiyi müsahibədə qeyd edib.
Kalugin həmçinin vurğulayıb ki, Rusiya öz növbəsində Cənubi Qafqazda təhlükəsizliklə bağlı beynəlxalq müzakirələrin bir hissəsi olaraq Gürcüstan, Abxaziya və Cənubi Osetiya arasında münasibətləri bərpa etmək üçün səylərini davam etdirir.
