Son günlər Azərbaycanda ət məhsullarının qiymətində yenidən artım müşahidə olunur. Bazarlarda və satış məntəqələrində xüsusilə mal və qoyun ətinin əvvəlki aylarla müqayisədə daha baha qiymətə təklif edildiyi bildirilir.
Satıcılar qiymət dəyişikliklərini müxtəlif iqtisadi amillərlə əlaqələndirsələr də, alıcılar bahalaşmanın ailə büdcəsinə təsir etdiyini deyirlər. Mövzu həm sosial şəbəkələrdə, həm də ictimai müzakirələrdə diqqət çəkir. Qiymət artımının səbəbləri və qarşıdakı dövrdə bazarda vəziyyətin necə dəyişəcəyi ilə bağlı fərqli fikirlər səsləndirirlər.
1xeber.media xəbər verir ki,məsələ ilə bağlı Demokrat.az-a danışan iqtisadçı Razi Abbasbəyli bildirib ki, hazırda ölkəmizdə elə bir mövsüm dövrü yaşanır ki, ərzaq rasionunda ət və ət məhsullarına tələbat azalır:
“Yaz və yay aylarında həm ətin saxlanma şəraitinin çətinləşməsi, həm də ərzaq səbətində alternativ qidaların artması nəticəsində ətə olan tələbat aşağı düşür. Bu da qiymətlərin ucuzlaşmasına səbəb olur.
Qurban bayramından sonra ətin qiymətində qismən ucuzlaşma və ya ən azı sabitləşmə müşahidə oluna bilər. Payız aylarında Azərbaycanda ətin qiymətində ciddi artım gözlənilir. Bunun əsas səbəbi hazırkı mövsümdə maldarlıq təsərrüfatları üçün yem tədarükü sahəsində yaranan problemlərlə bağlıdır. Son dövrlərdə havaların intensiv yağıntılı keçməsi xüsusilə yem bitkilərinin əkildiyi sahələrdə biçin və tədarük prosesinə ciddi mənfi təsir göstərib. Hazırda regionlarda yonca təsərrüfatlarında biçin dövrü getsə də, yağıntıların çox olması həm biçin işlərini gecikdirir, həm də tədarük edilməli məhsulun bir hissəsinin məhv olmasına səbəb olur. İlkin mərhələdə, xüsusilə birinci biçin dövründə yonca təsərrüfatları ciddi zərərə məruz qalıb və məhsuldarlıq əhəmiyyətli dərəcədə azalıb”.
O qeyd edib ki, bu azalmanın təsiri isə bir neçə aydan sonra, payız mövsümündə daha aydın hiss olunacaq:
“Problemlər yalnız yonca təsərrüfatları ilə məhdudlaşmır. Maldarlıq üçün yem məqsədilə əkilən digər bitkilərdə də oxşar vəziyyət müşahidə olunur. Buraya qarğıdalı və çuğundur sahələri də daxildir. Müşahidələr göstərir ki, əlverişsiz hava şəraiti həmin məhsulların tədarükünü ciddi şəkildə çətinləşdirib və bəzi hallarda məhsuldarlıq demək olar yarıyadək azalıb.
Bütün bunlar nəticə etibarilə yem tədarükünün maya dəyərini artıracaq. Bu isə payız aylarında maldarlıq təsərrüfatlarında xərclərin yüksəlməsinə, nəticədə mal və qoyun ətinin qiymətinin bahalaşmasına səbəb olacaq. Hazırkı qiymət artımı keçici xarakter daşıyır və böyük ehtimalla yay aylarında, təxminən sentyabra qədər ətin qiymətində ciddi bahalaşma müşahidə olunmayacaq. Lakin payız aylarından etibarən bazarda ətin qiymətinin nəzərəçarpacaq dərəcədə artacağı gözlənilir”.
