Deputat Hikmət Babaoğlu və İT eksperti Elvin Abbasov hesab edir ki, Rəqəmsal İnkişaf Şurası dövlət idarəçiliyində səmərəliliyin artırılması, süni intellekt və kibertəhlükəsizlik sahəsində yeni mərhələnin başlanğıcı olacaq.
Azərbaycanın rəqəmsal transformasiya strategiyasında yeni mərhələnin əsası qoyulub. Birinci vitse-prezident Mehriban Əliyevanın sədrliyi ilə Rəqəmsal İnkişaf Şurasının ilk iclası keçirilib. İclasda dövlət idarəçiliyində rəqəmsal həllərin tətbiqinin genişləndirilməsi, dövlət xidmətlərinin daha çevik və əlçatan formada təqdim olunması, süni intellekt, kibertəhlükəsizlik, məlumatların idarə olunması və dövlət qurumları arasında vahid rəqəmsal koordinasiya mexanizmlərinin yaradılması əsas müzakirə mövzuları olub.
Mövzu ilə bağlı Milli Məclisin deputatı Hikmət Babaoğlu 1xəbər.media-ya açıqlamasında bildirib ki, Rəqəmsal İnkişaf Şurasının yaradılması Azərbaycanın dövlət idarəçiliyində mühüm institusional yenilikdir.
Deputatın sözlərinə görə, rəqəmsal inkişaf artıq dövlət idarəçiliyinin gələcəyini müəyyən edən əsas istiqamətlərdən biridir:
“Rəqəmsal inkişaf dövlət idarəetməsinin, dövlət xidmətlərinin vətəndaşlara çatdırılmasının və bu xidmətlərin funksionallığının artırılmasının yeni modelidir. Bu model dövlət təhlükəsizliyindən başlayaraq müxtəlif sahələrdə idarəetmənin daha səmərəli qurulmasına, vətəndaş məmnuniyyətinin yüksəldilməsinə və müasir idarəçilik institutlarının formalaşdırılmasına imkan yaradacaq. Birinci vitse-prezident Mehriban Əliyevanın rəhbərliyi ilə Şuranın ilk iclasının keçirilməsi bu istiqamətdə artıq praktik addımların atıldığını göstərir.”
Hikmət Babaoğlu qeyd edib ki, Azərbaycanın dövlətçilik institutları yeni tarixi mərhələyə daxil olub və bu proses ölkənin formalaşdırdığı yeni reallıqlarla birbaşa bağlıdır.
Deputatın fikrincə, Rəqəmsal İnkişaf Şurası yaxın illərdə həm milli təhlükəsizliyin möhkəmləndirilməsi, həm də dövlət-vətəndaş münasibətlərinin daha səmərəli təşkili baxımından əsas koordinasiya mərkəzlərindən birinə çevriləcək.
İT eksperti Elvin Abbasov isə bildirib ki, süni intellekt artıq yalnız texnoloji yenilik deyil, dövlətlərin strateji inkişafını müəyyən edən əsas alətlərdən biridir.
Ekspertin sözlərinə görə, müasir dövrdə süni intellektin ən perspektivli tətbiq sahələri kibertəhlükələrin real vaxt rejimində aşkarlanması, kritik infrastrukturun qorunması, böyük verilənlərin analizi, ağıllı kənd təsərrüfatı, enerji resurslarının idarə olunması və rəqəmsal səhiyyə sistemlərinin inkişafıdır.
