Sabiq icra başçılarına azadlıq şansı: Cəzası azaldılan eks-məmurlar vaxtından əvvəl buraxıla bilər
Azərbaycanda korrupsiya və mənimsəmə ittihamları ilə həbs edilmiş sabiq icra başçılarının cəza müddətlərinin müxtəlif instansiya məhkəmələrində əhəmiyyətli dərəcədə azaldılması onların vaxtından əvvəl azadlığa çıxmaq imkanlarını gündəmə gətirib .
1xeber.media xəbər verir ki, “Yeni Müsavat”a danışan “Bakı” Hüquq Şirkətinin rəhbəri, hüquqşünas Natiq Ələsgərov bildirib ki, cəza müddətləri azaldılan və uzun müddətdir həbsdə olan eks-başçıların qanunvericilikdə nəzərdə tutulan şərti olaraq vaxtından əvvəl azad edilmə institutundan yararlanmaq hüququ yaranıb.
Məhkəmə materiallarına və son qərarlara əsasən, həbsdə olan sabiq icra başçılarının mövcud cəza statusu aşağıdakı kimidir:
- Vilyam Hacıyev (İmişli): Cəzası 12 ildən 8 il 6 aya endirilib.
- Mahir Quliyev (Biləsuvar): Cəzası 11 ildən 8 il 3 aya endirilib.
- İsmayıl Vəliyev (Neftçala): Cəzası 10 ildən 6 il 2 aya endirilib.
- Alimpaşa Məmmədov (Şəmkir): Cəzası 11 il 6 aydan 10 il 6 aya endirilib.
- Namiq Zeynalov (Cəlilabad): Cəzası 12 ildən 11 il 9 aya endirilib.
- Qoca Səmədov (Yevlax) və Ceyhun Cəfərov (Kürdəmir): Cəza müddətlərinin azaldılması sayəsində artıq tamamilə azadlığa çıxıblar.
- Musa Şəkiliyev (Qax): DTX tərəfindən saxlanılıb, barəsindəki həbs-qətimkan tədbirinin müddəti iyulun 13-nə qədər uzadılıb və istintaqı davam edir.
Hüquqşünasın sözlərinə görə, qanunla müəyyən edilmiş cəza hissəsini faktiki çəkən, həbsxanada müsbət xarakterizə olunan və ən əsası – dövlətə vurduğu maddi ziyanı tam ödəyən məhkumlar barəsində məhkəmələr azadlıq qərarı verə bilər. Bu mexanizmin fərdi güzəşt olmadığını deyən ekspert, hər bir sabiq məmurun işinə fərdi qaydada baxıldığını və ziyanın ödənilmə dərəcəsinin bu qərarlarda həlledici rol oynadığını vurğulayıb.
