1xeber.media MeydanBizim-ə istinadən xəbər verir ki, Ukraynanın Rusiyanın enerji infrastrukturuna qarşı həyata keçirdiyi uzaqmənzilli hücumlar son aylarda daha da intensivləşib. Beynəlxalq mediada yer alan məlumatlara görə, xüsusilə neft emalı müəssisələri əsas hədəflərdən birinə çevrilib.
“Financial Times” nəşrinin məlumatına əsasən, təkcə may ayında Rusiyanın müxtəlif bölgələrində yerləşən neft emalı zavodlarına 16 uğurlu zərbə endirilib. Nəşr bunu bir ay ərzində qeydə alınan ən yüksək göstəricilərdən biri kimi qiymətləndirir.
Məlumata görə, 2026-cı ilin əvvəlindən indiyədək Rusiyanın neft emalı obyektlərinə ümumilikdə azı 194 hücum həyata keçirilib. Bildirilir ki, bu göstərici ötən ilin eyni dövrü ilə müqayisədə 11 dəfə çoxdur.
Nəşr qeyd edir ki, enerji infrastrukturuna endirilən zərbələr Rusiyada yanacaq təminatına əlavə təzyiq yaradır və ölkənin enerji sektorunda yaranmış çətinlikləri daha da dərinləşdirir. Analitiklər hesab edirlər ki, bu strategiya yalnız iqtisadi təsir göstərmək deyil, həm də hərbi-logistika imkanlarını zəiflətmək məqsədi daşıyır.
“Financial Times”ın təhlilində bildirilir ki, cəbhədə və strateji obyektlərə qarşı hücumların artması yaxın müddətdə diplomatik proseslərin canlanması ehtimalını da azaldır. Nəşrin istinad etdiyi mənbələrin sözlərinə görə, Rusiya rəhbərliyi hərbi məqsədlərində ciddi dəyişiklik etməyib və Donetsk istiqamətində əməliyyatların davam etdirilməsini planlaşdırır.
Qeyd edək ki, xəbərdə yer alan məlumatlar “Financial Times” nəşrinin istinad etdiyi mənbələrə əsaslanır. Münaqişə tərəfləri bu iddiaların hamısını müstəqil şəkildə təsdiqləməyib.
