Çexiyada NATO sammiti ərəfəsində ölkənin ali rəhbərliyi arasında ciddi siyasi qarşıdurma yaranıb. Prezident Petr Pavel və Baş nazir Andrey Babiş NATO sammitində ölkəni kimin təmsil edəcəyi ilə bağlı açıq mübahisəyə başlayıblar.
1xeber.media xəbər verir ki, mübahisə Çexiya Konstitusiya Məhkəməsinin qərarından sonra daha da dərinləşib. Məhkəmə hökumətin Prezident Petr Pavelin NATO sammitində iştirakına mane olmamasını tələb etsə də, Baş nazir Andrey Babiş hökumətin sammitdə nümayəndə heyətinə məhz özünün rəhbərlik edəcəyini açıqlayıb.
Prezident Petr Pavel isə bunun ölkədə formalaşmış siyasi ənənəyə zidd olduğunu bildirib. O qeyd edib ki, Çexiya 1999-cu ildə NATO-ya üzv olduqdan sonra keçirilən sammitlərin əksəriyyətində ölkə nümayəndə heyətinə prezident rəhbərlik edib və bu praktikanın davam etdirilməsi vacibdir.
Analitiklərin fikrincə, qarşıdurmanın əsas səbəbi yalnız protokol məsələsi deyil. Prezident Petr Pavel Ukraynaya hərbi dəstəyin artırılmasının tərəfdarı olduğu halda, Baş nazir Andrey Babiş hökuməti müdafiə xərclərinin artırılmasına və Kiyevə yeni hərbi yardım göstərilməsinə daha ehtiyatlı yanaşır. Bu fikir ayrılığı NATO sammiti öncəsi siyasi gərginliyi daha da artırıb.
Ekspertlər hesab edirlər ki, yaranmış vəziyyət Çexiyanın beynəlxalq imicinə də təsir göstərə bilər. Çünki NATO liderlərinin görüşü ərəfəsində ölkənin ali rəhbərliyinin vahid mövqe nümayiş etdirə bilməməsi alyans daxilində diqqətlə izlənilən məsələlərdən birinə çevrilib.
