1xeber.media xəbər verir ki, Kiyevli polittexnoloq Andrey Zolotaryov özünün YouTube kanalında Ukraynada Patriot hava hücumundan müdafiə sistemləri üçün raketlərin istehsalının mümkün olmadığını bildirib.
Onun sözlərinə görə, hətta Ukrayna bu cür istehsal üçün lisenziya əldə etsə belə, ölkə daxilində belə zavodların yerləşdirilməsi çətin olacaq. Zolotaryov qeyd edib ki, Rusiya hərbçiləri bu tip istehsal müəssisələrini davamlı şəkildə hədəfə ala bilər.
Ekspert əlavə edib ki, Ukraynada bunun üçün zəruri mühəndis bazası da yoxdur. Raket istehsalının qonşu ölkələrdə, məsələn, Polşada qurulması variantının isə münasibətlərdəki gərginlik fonunda real görünmədiyini bildirib.
“Aydındır ki, Rusiya hərbçiləri zəif nöqtə tapdıqda, ora sistemli şəkildə zərbələr endirəcəklər. Bir həftə ərzində baş verən iki güclü zərbə bunun göstəricisidir. Bundan əlavə, reaktiv dronların istifadəsi də var – bu, kiçik ölçülü raketə bənzəyir”, – deyə Zolotaryov bildirib.
O vurğulayıb ki, yaxın perspektivdə Ukraynanın “Patriot” sistemləri üçün öz raket-interseptorlarını istehsal etməsi gözlənilmir.
“Bu, təbliğat üçün yarayır. Bu, Vladimir Aleksandroviçin (Zelenskinin) üslubundadır – siyasi addımları və qərarları piarla əvəz etmək. O, hələlik bunun öhdəsindən uğurla gəlir”, – deyə ekspert fikrini yekunlaşdırıb.
Bundan əvvəl Rusiya Dövlət Dumasının Müdafiə Komitəsinin üzvü Andrey Kolesnik də Ukraynanın öz Patriot sistemlərinin istehsalını qurmaq imkanlarının çox aşağı olduğunu bildirib. Onun sözlərinə görə, belə bir layihə həyata keçirilsə belə, ən yaxşı halda 10-15 il vaxt tələb edə bilər.
Kolesnik əlavə edib ki, Rusiya tərəfi bu prosesləri izləyəcək və belə istehsalın Ukrayna ərazisində yerləşdirilməsinə imkan verməyəcəyini bildirib.
