Sağlamlıq arayışının alınması üçün uşaqların qeydiyyatda olduqları yox, fərqli poliklinikalara göndərilməsi narazılıq yaradıb.
Bu barədə narazı valideynlər sosial şəbəkələrdə yazıblar. Səhiyyə Nazirliyinə və TƏBİB-ə etiraz edən valideynlər bildirib ki, yeni qərar onları çətin vəziyyətə salıb.
Elşən Hüseynov adlı şikayətçi bildirib ki, arayış almaq istəyən valideynlər uşaqlarla birgə bu istilərdə yollarda qalıb: “Səhiyyə Nazirliyi, kimsə sizdən izah edə bilər ki, uşaqlara məktəbə, bağçaya arayış almaq üçün niyə öz qeydiyyatda olduğumuz poliklinikada yoxlanışları etmirik? Bəziləri burada, bəziləri başqa rayon ərazisində niyə? Təsəvvür edin ki, Qaradağda yaşayan körpə uşaqlı valideyn Binəqədiyə göndərilib, Binəqədidə yaşayan isə digər poliklinikalara. Niyə? Siz hansı islahatları aparırsız?”.
Hüseynov həmçinin əlavə edib ki, bu qayda bu ildən qüvvəyə minib: “Bu il belə olub. Səbəb kimi isə həkimlərin məzuniyyətdə olması göstərilir. Bu gün biz 20 saylı poliklinikada qeydiyyatda olduğumuz halda, 9-cu mikrorayondakı 21 saylı və 12 saylı uşaq poliklinikasına getdik. 20 saylı poliklinikada da Xocahəsəndən göndərilənlərlə rastlaşdıq. Hələ oradan da başqa yerə gedəcəkdilər. Tək biz yox, arayış almaq istəyən hamıya Bakıdakı poliklinikaları gəzdirirdilər”.
İlkin Aslan adlı şikayətçi də bir arayış üçün başqa ünvana göndərildiyini bildirib:
“Mən 9-cü mikrorayonda qalıram, qeydiyyatım da ordadır. Məni bir aparatdan keçmək üçün göndərdilər başqa ünvana. Adını da qoydular ki, burada aparat yoxdur”
