Rusiya Dövlət Dumasında uzunmüddətli evliliklərə görə vətəndaşlara pul ödənişlərinin verilməsi ilə bağlı təşəbbüslər hazırda ciddi şəkildə müzakirə olunmur.
1xeber.media xəbər verir ki, bunu Dövlət Dumasının Ailə, Atalıq, Analıq və Uşaqlıq Məsələləri üzrə Komitəsinin sədr müavini Vitali Milonov bildirib.
Deputatın sözlərinə görə, bu cür təkliflər əsasən seçki kampaniyası dövründə diqqət çəkmək məqsədilə irəli sürülür və parlamentin gündəliyində prioritet məsələ hesab edilmir.
"İndi seçki kampaniyası gedir. Ola bilər ki, bəzi həmkarlarımız informasiya gündəmi yaratmaq üçün belə təşəbbüslərlə çıxış etsinlər. Lakin biz bu məsələni ciddi şəkildə müzakirə etmirik", – deyə Milonov bildirib.
O, həmçinin vurğulayıb ki, uzunmüddətli evliliklərə görə ödənişlərin tətbiqi hər hansı real sosial problemi həll etmir. Deputatın fikrincə, belə təşəbbüslər yalnız simvolik təşəkkür xarakteri daşıya bilər.
Milonov qeyd edib ki, Sankt-Peterburqda uzun illər birlikdə yaşayan ailələrə artıq xatirə xarakterli hədiyyələr təqdim olunur və bunun əlavə maliyyə ödənişinə çevrilməsinə ehtiyac görmür.
